آبنائے ہرمز پر مثبت پیش رفت، عالمی منڈی میں خام تیل کی قیمتوں میں نمایاں کمی

عالمی منڈی میں آبنائے ہرمز سے متعلق مثبت پیش رفت اور تجارتی تحفظ کے اشاروں کے بعد خام تیل کی قیمتوں میں نمایاں کمی ریکارڈ کی گئی ہے۔ تازہ ترین اعداد و شمار کے مطابق امریکی کروڈ آئل کی قیمت 5.29 فیصد کی بڑی کمی کے بعد 76.09 امریکی ڈالر فی بیرل تک نیچے آ گئی ہے، جبکہ بین الاقوامی معیار کا برینٹ کروڈ آئل 4.77 فیصد سستا ہو کر 79.77 ڈالر فی بیرل کی سطح پر پہنچ گیا ہے۔ اس سے قبل بھی مثبت اطلاعات کے باعث امریکی خام تیل 4.97 فیصد کی کمی سے 76.35 ڈالر اور برینٹ کروڈ 4.20 فیصد کمی کے بعد 80.25 ڈالر فی بیرل پر ریکارڈ کیا گیا تھا۔ معاشی ماہرین کا کہنا ہے کہ آبنائے ہرمز کے معاملے پر کشیدگی میں کمی کی توقعات سے عالمی سپلائی چین کے خدشات دور ہوئے ہیں جس کے اثرات پٹرولیم مصنوعات کی عالمی قیمتوں پر واضح نظر آ رہے ہیں۔