ایران کو آخری موقع دے دیا، آبنائے ہرمز کل مکمل طور پر کھل جائے گی: ٹرمپ کا دعویٰ

امریکی صدر ڈونلڈ ٹرمپ نے دعویٰ کیا ہے کہ آبنائے ہرمز کل سے مکمل طور پر کھل جائے گی، جبکہ اس کے بعد دوسرے مرحلے میں ایران کے جوہری پروگرام سے متعلق تفصیلی مذاکرات کیے جائیں گے۔ وائٹ ہاؤس میں میڈیا سے گفتگو کرتے ہوئے صدر ٹرمپ نے کہا کہ آبنائے ہرمز کا معاملہ کوئی پیچیدہ مسئلہ نہیں ہے اور اس گزرگاہ کا فعال ہونا پہلے مرحلے کی کامیابی ہے۔ انہوں نے واشنگٹن کے روایتی موقف کو دہراتے ہوئے واضح کیا کہ امریکا ایران کو کسی صورت جوہری ہتھیار حاصل نہیں کرنے دے گا۔ امریکی صدر نے مزید کہا کہ آبنائے ہرمز سے گزرنے والے تجارتی بحری جہازوں پر کوئی فیس عائد نہیں کی جائے گی اور اگر کسی دوسرے فریق نے ایسا کرنے کی کوشش کی تو اس کا مناسب جواب دیا جائے گا۔ انہوں نے دعویٰ کیا کہ اس گزرگاہ پر امریکا کو مکمل کنٹرول حاصل ہے اور ایران کے پاس مجوزہ دستاویز پر دستخط کرنے کا یہ آخری موقع ہے۔