مریضوں کو اسٹروک سے بچانے کیلیے نئی تکنیک وضع

نیویارک: محققین نے فالج (اسٹروک) سے بچاؤ کے لیے ایک انقلابی تکنیک دریافت کی ہے جس کے ذریعے دل کے ایک مخصوص حصے کو اندر سے مستقل طور پر بند کیا جا سکے گا۔ طبی ماہرین کے مطابق انسانی دل کے اوپری حصے میں بائیں جانب ایک چھوٹا سا پاؤچ ہوتا ہے جسے ‘لیفٹ ایٹریل اپینڈج’ (Left Atrial Appendage) کہا جاتا ہے۔ ‘ایٹریل فِبریلیشن’ یعنی دل کی دھڑکن بے ترتیب ہونے کی صورت میں خون اس پاؤچ میں جمع ہو کر ٹھہر جاتا ہے، جس سے خون کے لوتھڑے بننے لگتے ہیں۔
اگر یہ لوتھڑے اس پاؤچ سے نکل کر دماغ تک پہنچ جائیں تو خون کی روانی متاثر ہوتی ہے جو فالج کا سبب بنتی ہے۔ اس وقت اس کا روایتی علاج خون پتلا کرنے والی ادویات سے کیا جاتا ہے، تاہم ان ادویات کا بڑا نقصان جسم کے کسی بھی حصے سے خون کا بے تحاشہ بہنا ہے جو بعض مریضوں کے لیے جان لیوا ثابت ہو سکتا ہے۔
نئی دریافت شدہ تکنیک میں ‘میگنیٹک گائیڈڈ لیکوئڈ’ (Magnetically Guided Liquid) کا استعمال کیا گیا ہے۔ یہ مائع دل میں داخل ہو کر پاؤچ کو اندر سے مضبوطی سے سیل (Seal) کر دیتا ہے، جس سے وہاں خون جمع ہونے اور لوتھڑے بننے کا راستہ بند ہو جاتا ہے۔ اگرچہ اس تکنیک کا کامیاب تجربہ فی الحال جانوروں پر کیا گیا ہے، لیکن ماہرین پرامید ہیں کہ مستقبل قریب میں یہ طریقہ ‘ایٹریل فِبریلیشن’ کے مریضوں کے لیے خون پتلا کرنے والی ادویات کا ایک محفوظ اور مستقل متبادل ثابت ہوگا