کوہاٹ پولیس لائنز مسجد حملے میں شہید ہونے والوں کی نماز جنازہ ادا

پرانی پولیس لائنز کوہاٹ کی مسجد پر ہونے والے دہشت گردانہ حملے میں جامِ شہادت نوش کرنے والے شہدا کی نمازِ جنازہ باوقار اور پروقار تقریب میں ادا کر دی گئی ہے۔ نمازِ جنازہ میں انسپکٹر جنرل (آئی جی) پولیس خیبرپختونخوا ذوالفقار حمید، صوبائی وزیرِ اطلاعات شفیع اللہ جان، وزیرِ قانون آفتاب عالم، جنرل آفیسر کمانڈنگ (جی او سی)، کمشنر کوہاٹ، سول و عسکری حکام، شہدا کے غمزدہ اہلخانہ اور شہریوں کی بڑی تعداد نے شرکت کی۔ اس موقع پر کوہاٹ پولیس کے چاق و چوبند دستے نے شہدا کے جسدِ خاکی کو سلامی پیش کی جبکہ اعلیٰ حکام نے پھولوں کی چادریں چڑھائیں۔

نمازِ جنازہ کے بعد پولیس، پاک فوج اور سول انتظامیہ کے اعلیٰ افسران نے شہدا کی عظیم قربانیوں کو شاندار الفاظ میں خراجِ عقیدت پیش کیا، جس کے بعد تمام شہدا کے جسدِ خاکی تدفین کے لیے ان کے آبائی علاقوں کی طرف روانہ کر دیے گئے۔ آئی جی خیبرپختونخوا ذوالفقار حمید نے اس موقع پر میڈیا سے گفتگو کرتے ہوئے عزم کا اظہار کیا کہ شہدا کے خون کے ایک ایک قطرے کا حساب لیا جائے گا اور دہشت گردوں کے لیے خیبرپختونخوا کی سرزمیں مکمل طور پر تنگ کر دی جائے گی۔

آئی جی پی ذوالفقار حمید نے بزدلانہ اقدام کی شدید مذمت کرتے ہوئے کہا کہ دہشت گردوں نے نمازِ جمعہ کی ادائیگی میں مصروف نہتے نمازیوں کو نشانہ بنایا ہے، جو اس بات کا واضح ثبوت ہے کہ ان کا دینِ اسلام یا انسانیت سے کوئی تعلق نہیں ہے۔ انہوں نے مزید بتایا کہ سیکیورٹی ادارے دہشت گردوں کے پورے نیٹ ورک کا سراغ لگا رہے ہیں اور اس کارروائی میں ملوث تمام ملزمان اور ان کے سہولت کاروں کو جلد از جلد کیفرِ کردار تک پہنچایا جائے گا۔