ایران سے ڈیل ہو نہ ہو، جنگ میں جیت امریکا کی ہوگی: ٹرمپ

امریکی صدر ڈونلڈ ٹرمپ نے ایران کے ساتھ جاری کشیدگی اور عسکری محاذ آرائی پر اہم بیان دیتے ہوئے دعویٰ کیا ہے کہ کسی سیاسی معاہدے کے ذریعے ہو یا نہ ہو، ایران کے خلاف اس جنگ میں حتمی فتح امریکہ ہی کی ہو گی۔ ایران سے ممکنہ ڈیل یا مشرقِ وسطیٰ میں مزید امریکی افواج بھیجنے سے متعلق سوال کے جواب میں انہوں نے کہا کہ امریکہ یا تو کوئی انتہائی بہترین اور مضبوط معاہدہ کرے گا یا پھر تہران کے ساتھ کسی قسم کا کوئی معاہدہ نہیں کیا جائے گا۔

ڈونلڈ ٹرمپ نے دعویٰ کیا کہ امریکی بحریہ اور تجارتی جہاز اب آبنائے ہرمز سے رات کے اندھیرے میں گزرتے ہیں اور ایران کو اس کی خبر تک نہیں ہوتی، کیونکہ امریکی کارروائیوں میں ایران کا تمام ریڈار سسٹم مکمل طور پر تباہ کیا جا چکا ہے۔ انہوں نے کہا کہ اس وقت آبنائے ہرمز پر امریکہ کا مکمل کنٹرول قائم ہے۔ امریکی صدر نے مزید کہا کہ ایران اس وقت تاریخ کی سخت ترین معاشی بحران کا شکار ہے جہاں شرحِ تورم (مہنگائی) ۳۰۰ فیصد تک پہنچ چکی ہے اور ایرانی معیشت اس زوال پذیر سطح پر ہے جو اس نے ماضی میں کبھی نہیں دیکھی تھی۔

صدر ٹرمپ کا مزید کہنا تھا کہ ایران امریکہ کے ساتھ معاہدہ کرنا چاہتا ہے لیکن ان کے خیال میں وہ ابھی اس کے لیے مکمل طور پر تیار نہیں ہے۔ انہوں نے دعویٰ کیا کہ امریکی فوجی کارروائیوں نے تہران کی جوہری اور مائل ساز صلاحیت کو مکمل طور پر ختم کر دیا ہے، اور اگر امریکہ بروقت ایران پر حملہ نہ کرتا تو ایران نیوکلیئر بم بنانے میں کامیاب ہو جاتا اور اسے آسانی سے استعمال بھی کر سکتا تھا۔ انہوں نے واضح کیا کہ ایران اس وقت انتہائی کمزور پوزیشن میں ہے، جبکہ گزشتہ روز بھی امریکی صدر نے امید ظاہر کی تھی کہ ایران کے ساتھ جاری یہ جنگ جلد اپنے اختتام کی جانب بڑھے گی۔