امریکا میں تربیتی مشق کے دوران ایف 16 طیارہ گر کر تباہ

امریکہ میں ایک معمول کی ملٹری ٹریننگ فلائٹ کے دوران ایف-16 (F-16) جنگی طیارہ حادثے کا شکار ہو کر گر کر تباہ ہو گیا۔ غیر ملکی میڈیا کی رپورٹس کے مطابق یہ حادثہ ریاست مشی گن کی گرینڈ ٹراورس کاؤنٹی میں پیش آیا، جہاں طیارہ الپینا میں واقع نیشنل گارڈ بیس سے تربیتی مشق پر روانہ ہوا تھا، تاہم پرواز کے دوران اچانک زمین پر جا گرا۔ حادثے کے وقت طیارے کے گرنے کے مناظر کی ویڈیو سوشل میڈیا اور عالمی میڈیا پر تیزی سے وائرل ہو رہی ہے۔

ٹیکساس کے ملٹری ڈیپارٹمنٹ کی جانب سے جاری کردہ بیان کے مطابق تباہ ہونے والے ایف-16 طیارے کا تعلق ‘ٹیکساس ایئر نیشنل گارڈ’ کے 149ویں فائٹر ونگ سے تھا۔ خوش قسمتی سے طیارہ زمین سے ٹکرانے سے قبل ہی پائلٹ ایمرجنسی ایجیکشن کے ذریعے طیارے سے باہر نکلنے میں کامیاب رہا اور اس کی جان بچ گئی۔ فی الحال طیارے کے گرنے اور حادثے کی اصل وجوہات کا فوری تعین نہیں ہو سکا ہے، تاہم متعلقہ ملٹری حکام نے واقعے کی باضابطہ تحقیقات کا آغاز کر دیا ہے۔