مصنوعی مٹھاس سے فالج کا خطرہ، نئی تحقیق میں دماغی خلیوں کے نقصان کا خدشہ

مصنوعی مٹھاس (Artificial Sweetener) کے طور پر وسیع پیمانے پر استعمال ہونے والے کیمیکل ‘اسپرٹیم’ (Aspartame) کے حوالے سے سامنے آنے والی ایک نئی علمی و طبی تحقیق نے فالج کے دوران دماغی نقصان میں اضافے سے متعلق اہم تشویش پیدا کر دی ہے۔ ڈائٹ سوڈا، شوگر فری چیونگ گم اور کم کیلوریز والی مصنوعات میں استعمال ہونے والے اسپرٹیم پر کی جانے والی تحقیق سے معلوم ہوا ہے کہ فالج کے حملے کے وقت یہ کیمیکل دماغ کے متاثرہ بافتوں (Tissues) اور خلیوں کے ضیاع میں اضافے کا سبب بن سکتا ہے۔

تجربہ گاہ میں چوہوں اور خلیات پر کیے گئے اس تجربے کے دوران جن چوہوں کو اسپرٹیم ملا پانی پلایا گیا، اسکیمک فالج (Ischemic Stroke) کے بعد ان کے دماغ کے مردہ بافتوں کا رقبہ 58.6 فیصد تک بڑھ گیا، جبکہ اسپرٹیم سے پاک چوہوں میں یہ شرح صرف 24.3 فیصد تھی۔ خاص طور پر سوچنے اور یادداشت کو کنٹرول کرنے والے حصوں—سیریبرل کارٹیکس اور ہپپو کیمپس—کو زیادہ نقصان پہنچا۔ ماہرین کے مطابق اسپرٹیم خلیوں میں توانائی پیدا کرنے والے مرکز ‘مائٹوکونڈریا’ کو نقصان پہنچا کر آکسیڈیٹو اسٹریس بڑھاتا ہے جس سے خلیوں کی توانائی 25 فیصد تک کم ہو جاتی ہے۔ دلچسپ بات یہ ہے کہ دیگر دو مصنوعی سویٹنرز (سکرالوز اور ایسیسلفیم پوٹاشیم) میں ایسا زہریلا اثر نہیں دیکھا گیا۔ تاہم، محققین نے واضح کیا ہے کہ یہ نتائج فی الحال صرف لیبارٹری کی حد تک چوہوں پر ثابت ہوئے ہیں اور عام حالات میں انسانوں پر اس کا اثر تصدیق کرنے کے لیے مزید جامع تحقیق کی ضرورت ہے۔