لندن سے بنگلادیش جانیوالی پرواز میں مسافروں کے درمیان جھگڑے کی ویڈیو وائرل

لندن سے بنگلادیش جانے والی ‘بیمان بنگلادیش ایئرلائنز’ کی پرواز میں فضائی سفر کے دوران دو مسافروں کے درمیان شدید جھگڑے اور ہاتھا پائی کی ایک ویڈیو سوشل میڈیا پر تیزی سے وائرل ہو رہی ہے۔ میڈیا رپورٹس کے مطابق یہ واقعہ اس وقت پیش آیا جب پرواز فضا میں بلند تھی اور دو مسافروں کے درمیان کسی بات پر معمولی تلخ کلامی ہوئی۔ بات بڑھتے بڑھتے اس حد تک بگڑ گئی کہ دونوں نے ایک دوسرے پر گھونسوں کی بارش کر دی۔

پرواز کے دوران اس اچانک اور شدید لڑائی کے باعث جہاز میں موجود بچوں اور بزرگوں سمیت دیگر مسافروں میں شدید خوف و ہراس پھیل گیا۔ سوشل میڈیا پر سامنے آنے والی ویڈیو میں دیکھا جا سکتا ہے کہ شدید ہاتھا پائی کے دوران ایک مسافر کی شرٹ بھی پھٹ گئی جبکہ جہاز کا کیبن کرو اور دیگر مسافر دونوں کو الگ کرنے اور معاملا ٹھنڈا کرانے کی مسلسل کوشش کرتے رہے۔ ایئرلائن انتظامیہ یا متعلقہ حکام کی جانب سے اس واقعے کے بعد مسافروں کے خلاف کی جانے والی قانونی کارروائی سے متعلق فی الحال مزید تفصیلات جاری نہیں کی گئی ہیں۔