اسلام آباد میں احتجاج سے نمٹنے کے لیے تیار ہیں: محسن نقوی

وفاقی وزیر داخلہ محسن نقوی نے کہا ہے کہ اسلام آباد میں اپوزیشن کے متوقع احتجاج اور لانگ مارچ سے سخت انداز میں نمٹنے کے لیے سیکیورٹی فورسز مکمل طور پر تیار ہیں۔ اسلام آباد میں مسلم لیگ (ن) کے رہنما طلال چوہدری کے ہمراہ پریس کانفرنس کرتے ہوئے محسن نقوی نے واضح کیا کہ اسلام آباد ہائی کورٹ کا تفصیلی فیصلہ آ چکا ہے، جس کے بعد دارالحکومت پر کسی قسم کا سیکیورٹی دھاوا نہیں بولا جا سکتا۔ انہوں نے خبردار کیا کہ اگر کوئی قانون ہاتھ میں لے کر اسلام آباد آئے گا تو اس کے خلاف توہینِ عدالت کی قانونی کارروائی کی جائے گی۔

وزیر داخلہ نے سیاسی قیادت سے اپنے اپنے شہروں میں احتجاج کرنے کی اپیل کرتے ہوئے کہا کہ کسی صوبے پر حملہ کرنے یا وفاقی دارالحکومت کو بند کرنے کی اجازت نہیں دی جائے گی۔ ان کا کہنا تھا کہ ایک طرف ملک میں دہشت گردی کے واقعات بڑھ رہے ہیں اور ہم شہدا کے جنازے اٹھا رہے ہیں، جبکہ دوسری طرف سیاسی دھرنوں کی تیاری کی جا رہی ہے۔ انہوں نے وزیراعلیٰ خیبرپختونخوا کو مشورہ دیا کہ وہ احتجاجی مارچ کے بجائے اپنے صوبے میں دہشت گردی کے خلاف جنگ پر توجہ دیں۔ محسن نقوی نے تمام فورسز کو ہدایت کی ہے کہ مظاہرین کو ہر ممکن طریقے سے روکا جائے اور واضح کیا کہ اگر مارچ کے دوران ایک بھی جانی نقصان ہوا تو اس کے تمام تر ذمہ دار جلسے کے آرگنائزرز ہوں گے۔