وزیراعظم خصوصی ریلیف سکیم کا پورے پاکستان میں کامیاب اجرا

وزیراعظم خصوصی ریلیف سکیم کے تحت ملک بھر میں مستحق شہریوں کو ۱۰۰ روپے فی لٹر رعایتی نرخوں پر پٹرول کی فراہمی کا سلسلہ کامیابی سے جاری ہے۔ وزیراعظم محمد شہباز شریف نے عوام کی جانب سے موصول ہونے والی آراء اور تجویز کی روشنی میں ایک اور اہم عوامی فیصلے کی منظوری دی ہے، جس کے تحت اب ۵ لٹر سے کم پٹرول ڈلوانے والے موٹر سائیکلوں، چنگ چی اور رکشہ ڈرائیوروں کو بھی ہفتہ وار ایک ٹوکن کے ذریعے ۵۰۰ روپے کی براہِ راست رعایت فراہم کی جائے گی۔

حکومتی طریقہ کار کے مطابق اس کیٹیگری کے لیے ہر ہفتے ایک ٹوکن جاری کیا جائے گا، یوں مستحق افراد کو ایک ماہ کے دوران مجموعی طور پر ۴ ٹوکن فراہم کیے جائیں گے۔ دوسری جانب، ۸۰۰ سی سی تک گاڑی استعمال کرنے والے صارفین کے لیے سابقہ طریقہ کار برقرار رکھا گیا ہے، جس کے تحت وہ ہر ۱۰ روز میں ۱۰ لٹر پٹرول پر ۱۰۰ روپے فی لٹر رعایت حاصل کرتے رہیں گے اور انہیں ایک ماہ میں ۱۰ لٹر کے ۳ ٹوکن جاری کیے جاتے رہیں گے۔ اس سے قبل وزیراعظم شہباز شریف رجسٹریشن میسج کے تمام اخراجات ختم کر کے اسے مفت کرنے کی ہدایت بھی جاری کر چکے ہیں۔

علاوہ ازیں، وزیراعظم نے فیول ریلیف سکیم کا دائرہ کار وسیع کرتے ہوئے ۲۰ سال پرانی موٹر سائیکلوں، رکشوں اور چنگ چی رکشوں کو بھی اس میں شامل کرنے کی خصوصی ہدایت کی تھی جس پر عملدرآمد باضابطہ طور پر شروع کر دیا گیا ہے۔ اس نئ ہدایت کے بعد یکم جنوری ۲۰۰۶ء کے بعد رجسٹرڈ ہونے والی تمام موٹر سائیکلیں اور رکشے اب اس ریلیف سکیم میں اہلیت کے حامل ہو گئے ہیں۔ وزیراعظم شہباز شریف اس تمام عمل کی بذاتِ خود نگرانی کر رہے ہیں اور انہوں نے متعلقہ حکام کو تمام پٹرول پمپس پر عوام کو بغیر کسی رکاوٹ کے باوقار طریقے سے رعایت کی فراہمی یقینی بنانے کی ہدایت کی ہے۔