ملک میں ایڈز کے مریضوں میں مسلسل اضافہ ہو رہا ہے، قائمہ کمیٹی کا فرضی رپورٹ پر اظہار برہمی

مہش کمار میلانی کی زیرِ صدارت قومی اسمبلی کی قائمہ کمیٹی برائے صحت کا اہم اجلاس منعقد ہوا، جس میں ملک میں ایڈز کے بڑھتے ہوئے کیسز اور وزارتِ صحت کی جانب سے پیش کردہ رپورٹ پر شدید بحث ہوئی۔

کمیٹی کی رکن ڈاکٹر شازیہ ثوبیہ نے وزارتِ صحت کی رپورٹ کو غیر تسلی بخش قرار دیتے ہوئے مسترد کر دیا۔ انہوں نے انکشاف کیا کہ رپورٹ میں حقائق کو چھپایا گیا ہے؛ خیبر پختونخوا (KP) میں 2025 کے دوران 40 ہزار مریضوں کا تذکرہ تک نہیں کیا گیا، جبکہ اسلام آباد کے 300 اور بلوچستان کے 8 ہزار کے قریب کیسز بھی رپورٹ سے غائب ہیں۔ انہوں نے خبردار کیا کہ “اگر ایسی ناقص رپورٹ عالمی اداروں کو دی گئی تو یہ ہمارے منہ پر ماری جائے گی اور ملک کی سبکی ہوگی۔”

وفاقی وزیر صحت مصطفیٰ کمال نے کمیٹی کو جواب دیتے ہوئے کہا کہ “دس سال کا کام دس ماہ میں نہیں ہو سکتا۔” انہوں نے وضاحت کی کہ ایچ آئی وی کے 3 لاکھ مریضوں کا دعویٰ محض مفروضوں پر مبنی ہے۔ وفاقی وزیر نے فنڈز کی تقسیم پر بھی سوال اٹھایا کہ ‘گلوبل فنڈ’ کا 75 فیصد حصہ این جی اوز کو جا رہا ہے جبکہ حکومت کو صرف 25 فیصد ملتا ہے۔ انہوں نے مزید بتایا کہ بیرونِ ملک سے ڈی پورٹ ہونے والے 90 فیصد افراد میڈیکل وجوہات کی بنا پر واپس بھیجے جا رہے ہیں، جن کی اب بارڈر ہیلتھ سروسز کے ذریعے اسکریننگ کی جائے گی۔ سندھ میں بچوں میں مرض پھیلنے کی وجہ انہوں نے غیر معیاری سرنجز کے استعمال کو قرار دیا۔