عمران خان کی ہمشیرہ علیمہ 3 ایم پی او کے تحت گرفتار

پاکستان تحریکِ انصاف (پی ٹی آئی) کے بانی عمران خان کی ہمشیرہ علیمہ خان کو پنجاب پولیس نے لاہور سے حراست میں لے لیا ہے۔ خاندانی ذرائع کے مطابق لٹن روڈ تھانے کی پولیس نے علیمہ خان کو اس وقت گرفتار کیا جب وہ اپنے ڈرائیور کے ہمراہ جمخانہ جا رہی تھیں۔ ان کی گاڑی کو بھی پولیس نے لٹن روڈ تھانے میں منتقل کر کے تحویل میں لے لیا ہے۔

ذرائع کے مطابق علیمہ خان کو نقصِ امن کا باعث بننے سے روکنے کے لیے ۳ ایم پی او (Maintenance of Public Order) کے تحت حراست میں لیا گیا ہے۔ پولیس کی جانب سے ڈسٹرکٹ مجسٹریٹ (ڈی سی) لاہور کو درخواست جمع کرائی گئی تھی، جس پر باضابطہ طور پر ۳ ایم پی او کا حکم نامہ جاری کیا گیا۔

گرفتاری کے بعد قانونی کارروائی کی تکمیل پر بانی پی ٹی آئی کی ہمشیرہ علیمہ خان کو کوٹ لکھپت جیل لاہور منتقل کیا جائے گا۔ پولیس کا کہنا ہے کہ امن و امان کی صورتِ حال کو قابو میں رکھنے کے لیے متعلقہ قوانین کے تحت کارروائی کی گئی ہے۔