روزانہ 1300 بچے غذائی کمی کے باعث جاں بحق ہو رہے ہیں: وفاقی وزیر صحت

وفاقی وزیر صحت سید مصطفیٰ کمال نے ‘پاک فارما ہیلتھ کیئر ایکسپو’ کی افتتاحی تقریب سے خطاب کرتے ہوئے انکشاف کیا ہے کہ پاکستان میں روزانہ تقریباً 1300 بچے غذائی کمی (Malnutrition) کے باعث جان کی بازی ہار رہے ہیں، جو ایک انتہائی تشویشناک صورتحال ہے۔ انہوں نے کہا کہ ملک میں ہیلتھ کیئر سسٹم اور فارما انڈسٹری تیزی سے ترقی کر رہی ہے اور گزشتہ سال فارما برآمدات میں 38 فیصد کا نمایاں اضافہ ہوا ہے۔ حکومت فارما انڈسٹری کو مکمل ریلیف اور تعاون فراہم کر رہی ہے۔

وفاقی وزیر صحت نے بتایا کہ ڈرگ ریگولیٹری اتھارٹی آف پاکستان (ڈریپ) کو 85 فیصد تک ڈیجیٹل کر دیا گیا ہے جس سے کرپشن کے خاتمے میں مدد ملے گی اور 9 اکتوبر سے ادویات پر مؤثر چیک اینڈ بیلنس کے لیے نیا نظام متعارف کرایا جائے گا۔ انہوں نے نشاندہی کی کہ ساڑھے 26 کروڑ آبادی کے لیے صرف 22 ڈرگ انسپکٹر ہونا ایک بڑا چیلنج ہے۔ سید مصطفیٰ کمال نے نئے صوبوں کے قیام کی پرزور حمایت کرتے ہوئے کہا کہ انتظامی بہتری کے لیے نئے صوبے وقت کی ضرورت ہیں اور اس سے ملک مضبوط ہوگا۔ علاوہ ازیں، انہوں نے پاکستان، سعودی عرب اور ترکیہ کے درمیان دفاعی تعاون کو خوش آئند قرار دیتے ہوئے پاک فوج اور قیادت کی خدمات کو سراہا۔