لاہور آمد: وزیراعلیٰ کے پی کے سہیل آفریدی کا دو موریا پل پر خطاب، پنجاب پولیس کی سیکیورٹی لینے سے انکار اور حکومت

وزیراعلیٰ خیبر پختونخوا محمد سہیل آفریدی نے لاہور پہنچ کر دو موریا پل کے مقام پر پی ٹی آئی کے کارکنان کے ایک بڑے اجتماع سے خطاب کرتے ہوئے پنجاب حکومت اور پنجاب پولیس پر شدید تنقید کی۔ انہوں نے اعلان کیا کہ وہ پنجاب پولیس سے کسی قسم کی سیکیورٹی نہیں لیں گے کیونکہ یہی پولیس میلاد کی تیاری کرنے والے کارکن اشتیاق احمد کی شہادت میں ملوث ہے۔ وزیراعلیٰ نے کہا کہ پنجاب پولیس اپنے تھانوں میں واپس جائے، کیونکہ عوام ان سے اور ان کی وردی سے شدید نالاں ہیں۔ انہوں نے افسوس کا اظہار کرتے ہوئے کہا کہ ایک عاشقِ رسول کے ساتھ ناروا سلوک روا رکھا گیا اور انہیں شہید کیا گیا، جس پر متعلقہ حکام کو شرم آنی چاہیے۔

سہیل آفریدی نے مریم نواز پر طنز کرتے ہوئے کہا کہ پنجاب کی حکمران دعویٰ کرتی ہیں کہ انہیں بھارت کے بجائے پاکستان کے دیگر تین صوبوں سے خطرہ ہے، جبکہ میں آج واضح اعلان کرتا ہوں کہ مجھے پنجاب کے غیور بھائیوں اور بہنوں سے کوئی خطرہ نہیں ہے۔ انہوں نے موجودہ صوبائی حکومت کو فارم 47 اور دھاندلی کی پیداوار قرار دیتے ہوئے کہا کہ عوام نے اس جعلی حکومت کو مکمل طور پر مسترد کر دیا ہے۔ انہوں نے جذباتی انداز میں کہا کہ “پنجاب کے عوام میرے ہیں، پنجاب میرا ہے اور میں ان کا ہوں، ہم سب کا تعلق ایک ہی وطن پاکستان سے ہے”۔