کابینہ کی اقتصادی رابطہ کمیٹی کا بڑا فیصلہ: کم آمدن طبقے کے لیے 75 ارب روپے کے فیول ریلیف پیکیج

وفاقی وزیر خزانہ محمد اورنگزیب کی زیر صدارت کابینہ کی اقتصادی رابطہ کمیٹی (ای سی سی) کا اہم اجلاس منعقد ہوا، جس میں وزیراعظم کے کم آمدن طبقے کے لیے فیول ریلیف پیکیج کی منظوری دے دی گئی۔ ای سی سی نے اس پیکیج کے لیے 75 ارب روپے کی ٹیکنیکل سپلیمنٹری گرانٹ کی منظوری دی ہے۔ اسکیم کے تحت موٹر سائیکل اور رکشہ صارفین کو ہفتہ وار 500 روپے جبکہ 800 سی سی تک کی گاڑیوں کو ہر 10 روز میں 1000 روپے کا فیول ریلیف فراہم کیا جائے گا۔ یہ سہولت صرف غیر کمرشل صارفین کے لیے ہوگی اور ایک شخص صرف ایک گاڑی پر ریلیف حاصل کر سکے گا۔ شفافیت برقرار رکھنے کے لیے وزارتِ آئی ٹی ایک ڈیجیٹل ‘فیول پاس سسٹم’ تیار اور مینج کرے گی۔

اجلاس میں پاکستان نیشنل شپنگ کارپوریشن (پی این ایس سی) کی ملکیت اور انتظامی کنٹرول کی تنظیم نو کے فریم ورک کے ساتھ ساتھ وزیر نجکاری کی سربراہی میں قائم کمیٹی کی سفارشات منظور کر لی گئیں۔ اس کے علاوہ، ای سی سی نے موجودہ آئل ریفائنریوں کی اپ گریڈیشن کے لیے ڈرافٹ معاہدے اور پانچ سالہ مدت کی منظوری دی، جبکہ جولائی 2025 تا جون 2026 کے غیر ایڈجسٹڈ سیلز ٹیکس کلیمز کو ان لینڈ فریٹ ایکوولائزیشن مارجن (IFEM) کے ذریعے نمٹانے کی تجویز بھی منظور کی۔ تاہم، استعمال شدہ گاڑیوں کی کمرشل درآمد سے متعلق معاملہ فی الوقت مؤخر کر دیا گیا۔

اقتصادی رابطہ کمیٹی نے مقامی مارکیٹ میں قیمتوں کے استحکام اور مناسب ذخائر کی شرط کے ساتھ 2 لاکھ میٹرک ٹن اضافی چینی برآمد کرنے کی اجازت دی ہے۔ مزید برآں، شنگھائی تعاون تنظیم (ایس سی او) کے سربراہی اجلاس کے انعقاد، سربراہانِ مملکت کے لیے فول پروف سیکیورٹی اور سفری انتظامات کے پیشِ نظر 15 بلٹ پروف گاڑیوں کی خریداری کے لیے 3 ارب روپے کے فنڈز کی منظوری دی گئی، جبکہ حکام کو ایس سی او اجلاس کی بروقت اور جامع تیاریاں یقینی بنانے کی سخت ہدایت کی گئی۔