ملک میں فاشزم اور معاشی بحران عروج پر، 27 ستمبر کو عوام کے حقوق اور آئین کی بحالی کے لیے نکلیں گے: راجہ ناصر عباس

قائدِ حزبِ اختلاف سینیٹ علامہ راجہ ناصر عباس نے میڈیا سے گفتگو کرتے ہوئے ملک کی موجودہ سیاسی و معاشی صورتحال پر شدید تشویش کا اظہار کرتے ہوئے کہا ہے کہ پاکستان تحریک انصاف (پی ٹی آئی) ملک کی سب سے بڑی سیاسی جماعت ہے، مگر اس کا سیاسی دم گھونٹا جا رہا ہے اور پنجاب سمیت مختلف علاقوں میں سخت کریک ڈاؤن جاری ہے۔ انہوں نے ملک بھر میں جاری فاشزم اور مظاہرین پر تشدد کو قابلِ مذمت قرار دیتے ہوئے کہا کہ حاکمانِ وقت پرامن احتجاج کرنے والوں کے سروں پر گولیاں مار رہے ہیں، حالانکہ جن معاشروں میں احتجاج کرنے کا حق ختم ہو جائے وہ معاشرے تباہ ہو جاتے ہیں۔

راجہ ناصر عباس نے خبردار کیا کہ پاکستان شدید معاشی، سیاسی اور امن و امان کے بحرانوں میں گھرا ہوا ہے اور ملک اقتصادی دیوالیہ پن کی جانب بڑھ رہا ہے۔ انہوں نے الزام عائد کیا کہ موجودہ نظام میں اصولوں کے بجائے صرف جی حضوری کو معیار بنا لیا گیا ہے، جہاں بڑا سے بڑا مجرم بھی حکومت کا ساتھ دینے پر بے گناہ قرار دے دیا جاتا ہے۔ صوبائی بنیادوں پر نفرتیں پھیلانے کی شدید مخالفت کرتے ہوئے انہوں نے واضح کیا کہ اس قسم کے اقدامات سے ملک کی فیڈریشن اور سالمیت کو سنگین خطرات لاحق ہو چکے ہیں، کیونکہ طاقت کے استعمال سے نظام نہیں چلایا جا سکتا۔

ان کا مزید کہنا تھا کہ پارلیمان مکمل طور پر معذور اور غیر متعلق ہو چکی ہے، جبکہ عدالتوں سے بھی طالع آزماؤں کے حق میں اور بنیادی انسانی حقوق کے خلاف فیصلے لیے جا رہے ہیں جن سے جمہوریت کو شدید نقصان پہنچ رہا ہے۔ سینیٹ میں اپوزیشن لیڈر نے اعلان کیا کہ تمام تر قومی مسائل، آئین کی حکمرانی اور رول آف لا کے قیام کے لیے پی ٹی آئی کے 27 ستمبر کے احتجاجی مارچ کی کامل حمایت کی جائے گی اور عوام اپنے حقوق کے دفاع کے لیے سڑکوں پر نکلیں گے کیونکہ ملک کو صرف اور صرف آئین و قانون کی بالادستی کے ذریعے ہی بچایا جا سکتا ہے۔