ماں اور بیٹے کی ایک ساتھ انجینئرنگ کی ڈگری حاصل کر کے منفرد مثال قائم

بھارت کے نامور تعلیمی ادارے انڈین انسٹیٹیوٹ آف ٹیکنالوجی (آئی آئی ٹی) مدراس کی حالیہ تقریبِ اسناد میں ایک منفرد اور دل چھو لینے والا منظر اس وقت دیکھنے میں آیا جب 45 سالہ ماں جیگیشا ٹیلر اور ان کے 21 سالہ بیٹے آدتیہ کپاڈیا نے ایک ہی اسٹیج پر ایک ساتھ انجینئرنگ کی ڈگریاں حاصل کیں۔ دونوں نے آئی آئی ٹی مدراس کے آن لائن ڈیٹا سائنس اینڈ ایپلی کیشنز پروگرام کو کامیابی سے مکمل کیا۔ گجرات سے تعلق رکھنے والی جیگیشا ٹیلر، جو 16 برس تک الیکٹرانکس کی تدریس سے وابستہ رہنے کے بعد گھریلو مصروفیات کی وجہ سے ملازمت چھوڑ چکی تھیں، نے اپنے بیٹے کی حوصلہ افزائی پر 2022 میں اس پروگرام میں داخلہ لیا تھا، جبکہ ان کے بیٹے آدتیہ نے 2021 میں داخلہ لے کر 2024 میں بی ایس کی ڈگری حاصل کی اور اب وہ ڈیٹا سائنس کے شعبے میں برسرِ روزگار ہیں۔ تقریب کے دوران ایک ہم جماعت کی تجویز پر دونوں کو ایک ساتھ اسٹیج پر بلایا گیا، جہاں انہوں نے ڈگریاں وصول کیں۔ ماں اور بیٹے کا کہنا ہے کہ اس مشترکہ تعلیمی سفر نے نہ صرف ان کے علم میں اضافہ کیا بلکہ ان کے باہمی رشتے کو بھی مزید پختہ اور مضبوط بنا دیا ہے۔