اسحاق ڈار کی کفایت شعاری اقدامات کے فیصلوں پر عملدرآمد کی ہدایت

نائب وزیراعظم اسحاق ڈار کی زیر صدارت سرکاری سطح پر بچت اور کفایت شعاری کے اضافی اقدامات کی نگرانی اور نفاذ کے لیے قائم کردہ اعلیٰ سطح کی کمیٹی کا ایک اہم اجلاس منعقد ہوا۔

دفتر خارجہ کے ترجمان کے مطابق اجلاس کے دوران کمیٹی نے اب تک اٹھائے جانے والے کفایت شعاری اور بچت کے اقدامات پر ہونے والی پیش رفت کا تفصیلی جائزہ لیا، جبکہ اجلاس میں سرکاری امور کے اندر مالیاتی نظم و ضبط کو ہر صورت یقینی بنانے اور عوامی وسائل کے دانشمندانہ اور محتاط استعمال پر بھی بھرپور بات چیت کی گئی۔

اجلاس کے دوران نائب وزیراعظم اسحاق ڈار نے تمام متعلقہ وزارتوں اور ڈویژنوں کے حکام کو واضح ہدایات جاری کیں کہ وہ پچھلے اجلاسوں میں طے پانے والے فیصلوں پر تاخیر کے بغیر مکمل اور مؤثر طریقے سے عمل درآمد کو یقینی بنائیں۔ ترجمان نے بتایا کہ اس اجلاس میں وفاقی وزراء برائے انفارمیشن ٹیکنالوجی (IT)، موسمیاتی تبدیلی سمیت دیگر متعلقہ اعلیٰ حکام نے بھی شرکت کی۔