پی اے ای سی اور او جی ڈی سی ایل کے درمیان لیتھیم منصوبے پر تعاون کا معاہدہ

پاکستان اٹامک انرجی کمیشن کے ذیلی ادارے پاکستان انسٹی ٹیوٹ آف نیوکلیئر سائنس اینڈ ٹیکنالوجی (PINSTECH) اور آئل اینڈ گیس ڈویلپمنٹ کمپنی لمیٹڈ (OGDCL) کے درمیان اہم سائنسی معاہدے پر باضابطہ دستخط کر دیے گئے ہیں۔

اعلامیے کے مطابق، اس معاہدے کے تحت پینسٹییک او جی ڈی سی ایل کو ملک میں لیتھیم کے حصول کے منصوبے میں سائنسی اور تجزیاتی معاونت فراہم کرے گا۔ اس کے علاوہ، ادارہ او جی ڈی سی ایل کو مختلف معدنی عناصر کی جانچ، سائنسی تجزیے اور تابکار عناصر کی شناخت کے لیے خصوصی تکنیکی خدمات بھی مہیا کرے گا۔

یہ دستخطی تقریب او جی ڈی سی ایل کے مرکزی دفتر میں منعقد ہوئی، جس میں ممبر سائنس پی اے ای سی ڈاکٹر شکیل عباس روفی اور ایم ڈی و سی ای او او جی ڈی سی ایل احمد حیات لک نے خصوصی شرکت کی۔ معاہدے پر باضابطہ دستخط ڈی جی پینسٹییک ڈاکٹر قمر الحق اور جی ایم سپلائی چین او جی ڈی سی ایل اعجاز عباس رضوی نے کیے۔

تقریب کے دوران سربراہ سپیکٹرو میٹری گروپ منیب احمد شفیق نے عناصر کے تجزیے کے حوالے سے ادارے کی فنی صلاحیتوں پر بریفنگ دی۔ اعلامیے میں اس عزم کا اظہار کیا گیا ہے کہ پینسٹییک اور او جی ڈی سی ایل کا یہ باہمی اشتراک ملک کے معدنیات اور توانائی کے شعبوں میں نئے مواقع تلاش کرنے اور ملکی وسائل کی ترقی و پائیدار قومی مقاصد کے حصول میں ایک سنگِ میل ثابت ہوگا۔