کیلیفورنیا میں اسلامی تہواروں پر تعطیلات کو سرکاری قرار دیدیا گیا

امریکی ریاست کیلیفورنیا میں مسلم کمیونٹی کی طویل عرصے سے جاری مانگ کو تسلیم کرتے ہوئے اسلامی تہواروں عیدالفطر اور عیدالاضحیٰ کو سرکاری تعطیلات قرار دے دیا گیا ہے۔

کیلیفورنیا کے گورنر گیون نیوزوم نے اس حوالے سے قانون ‘اے بی 2017’ پر باضابطہ دستخط کر دیے ہیں، جس کے نفاذ کے بعد دونوں عیدوں کو ریاست کی سرکاری تعطیلات کی فہرست میں باضابطہ طور پر شامل کر لیا گیا ہے۔ کونسل آن امریکن اسلامک ریلیشنز (CAIR) کے کیلیفورنیا چیپٹر نے اس تاریخی قانون کی منظوری کا دل کی گہرائیوں سے خیرمقدم کیا ہے۔

واضح رہے کہ عید کے تہواروں کو سرکاری طور پر تسلیم کرنے سے متعلق یہ قانون رواں سال مارچ کے آغاز میں اسمبلی ممبر میٹ ہینی نے منظوری کے لیے پیش کیا تھا۔ قانون سازی کے موقع پر گفتگو کرتے ہوئے میٹ ہینی کا کہنا تھا کہ کیلیفورنیا ریاست ملک کی سب سے بڑی اور متحرک مسلم کمیونٹیز میں سے ایک کا گھر ہے، اس لیے یہاں بسنے والے مسلمانوں کی مذہبی روایات اور تہوار مکمل احترام اور سرکاری پذیرائی کے حق دار ہیں۔