برطانیہ: فائر فائٹر نے سابقہ محبوبہ سے رقم واپس لینے کے لیے چیٹ جی پی ٹی سے مدد لے لی

برطانیہ میں ایک فائر فائٹر نے لاٹری میں بھاری رقم جیتنے کے بعد اپنی سابقہ گرل فرینڈ کو دی گئی رقم قانونی جنگ لڑ کر واپس حاصل کر لی ہے۔ خاص بات یہ ہے کہ مہنگے وکلاء کی فیس سے بچنے کے لیے انہوں نے مصنوعی ذہانت کے پلیٹ فارم چیٹ جی پی ٹی (ChatGPT) سے قانونی رہنمائی حاصل کی اور عدالت میں اپنا مقدمہ خود لڑا۔

تفصیلات کے مطابق، 40 سالہ ہیتھرو ایئرپورٹ کے فائر فائٹر کریگ ٹِچنر نے نومبر 2019 میں ایک لاٹری کے اسکریچ کارڈ پر جیک پاٹ جیتا تھا۔ اس کے بعد 2022 میں انہوں نے اپنی اُس وقت کی گرل فرینڈ، 37 سالہ نفسیاتی نرس ہیدر ڈگلس کو 40 ہزار پاؤنڈ دیے تاکہ وہ اپنی مالیاتی مہارت کو بروئے کار لاتے ہوئے یہ رقم ان کی طرف سے سرمایہ کاری میں استعمال کریں۔ عدالت کو بتایا گیا کہ دونوں کے درمیان اس بات پر اتفاق ہوا تھا کہ یہ رقم پریمیم بانڈز میں لگائی جائے گی اور اس سے حاصل ہونے والا منافع آپس میں تقسیم کیا جائے گا۔

تاہم، بعد میں تعلقات خراب ہونے اور رشتہ ختم ہونے کے بعد ہیدر ڈگلس نے وہ 40 ہزار پاؤنڈ واپس کرنے سے صاف انکار کر دیا۔ دو بچوں کے والد کریگ ٹِچنر نے اس معاملے پر جب روایتی قانونی ماہرین اور وکلا سے رابطہ کیا تو انہوں نے بہت زیادہ فیس طلب کی، جو ان کے لیے ممکن نہیں تھا۔ ایسے میں انہوں نے جدید ٹیکنالوجی کا سہارا لیتے ہوئے چیٹ جی پی ٹی سے مدد لینے کا فیصلہ کیا۔ کریگ کے مطابق چیٹ جی پی ٹی نے انہیں انتہائی مہارت کے ساتھ مرحلہ وار قانونی رہنمائی فراہم کی کہ سنٹرل لندن کاؤنٹی کورٹ میں مقدمہ دائر کرنے کے لیے ضروری فارم اور دستاویزات کیسے مکمل کی جاتی ہیں۔

کریگ ٹِچنر نے اپنے اس تجربے پر بات کرتے ہوئے کہا کہ عدالت میں خود اپنا مقدمہ لڑنا ایک بہت بڑا اور پُرخطر قدم تھا، لیکن ان کے پاس کھونے کے لیے کچھ نہیں تھا۔ ان کا کہنا تھا کہ اگر چیٹ جی پی ٹی کی رہنمائی نہ ہوتی تو شاید وہ کبھی یہ مقدمہ نہ جیت پاتے۔

دوسری جانب، عدالت میں سماعت کے دوران ہیدر ڈگلس نے مؤقف اختیار کیا کہ یہ 40 ہزار پاؤنڈ انہیں بطور تحفہ (گفٹ) دیے گئے تھے۔ تاہم، وہ عدالت میں یہ بات ثابت کرنے میں ناکام رہیں اور نہ ہی انہوں نے اپنے دعوے کے حق میں کوئی بینک اسٹیٹمنٹس عدالت میں پیش کیں۔ چنانچہ عدالت نے تمام شواہد کا جائزہ لینے کے بعد گزشتہ ہفتے کریگ ٹِچنر کے حق میں فیصلہ سنا دیا۔ مقدمے کی کارروائی کے دوران فریقین کی جانب سے ایک دوسرے پر دیگر الزامات بھی عائد کیے گئے۔