روس میں ٹی یو 95 فوجی طیارہ گر کر تباہ، 6 اہلکار ہلاک

روسی میڈیا اور خبر ایجنسی کے مطابق روس کے امور ریجن (Amur Region) میں ایک فوجی طیارہ ‘ٹی یو 95’ (Tu-95) گر کر تباہ ہو گیا ہے، جس کے نتیجے میں طیارے پر سوار 6 اہلکار جاں بحق جبکہ ایک زخمی ہو گیا ہے۔

رپورٹس کے مطابق حادثے کے وقت طیارے میں کُل 7 اہلکار سوار تھے۔ یہ حادثہ امور ریجن کے ایک گاؤں کراسنویاروو کے قریب پیش آیا، جہاں گرنے کے بعد طیارے میں شدید آگ بھڑک اٹھی۔ حادثے میں زخمی ہونے والے واحد اہلکار کو فوری طور پر طبی امداد کے لیے قریبی اسپتال منتقل کر دیا گیا ہے۔

خبر ایجنسی کے مطابق حادثے کا شکار ہونے والا یہ طیارہ یوکرینکا ایئر گروپ (Ukrainka Air Group) سے تعلق رکھتا تھا۔ ابتدائی اطلاعات کے مطابق طیارے کو پیش آنے والے اس حادثے کی ممکنہ وجہ ایندھن کا دھماکا بتائی جا رہی ہے۔ روسی حکام نے اس بات کی تصدیق کی ہے کہ حادثے کی اصل وجوہات اور تکنیکی پہلوؤں کا مکمل احاطہ کرنے کے لیے اعلیٰ سطح پر باضابطہ تحقیقات شروع کر دی گئی ہیں۔