بیرسٹر گوہر کا سپیکر قومی اسمبلی ایاز صادق سے رابطہ، ملاقات کل ہوگی

پاکستان تحریک انصاف (PTI) کے چیئرمین بیرسٹر گوہر خان نے اسپیکر قومی اسمبلی سردار ایاز صادق کو ٹیلی فون کر کے ان سے باضابطہ طور پر ملاقات کا وقت مانگ لیا ہے۔

ذرائع کے مطابق بیرسٹر گوہر کی ٹیلی فونک کال کے جواب میں اسپیکر قومی اسمبلی نے آگاہ کیا کہ وہ اس وقت اپنے آبائی حلقے لاہور میں موجود ہیں اور کل اسلام آباد واپس آئیں گے۔ دونوں رہنماؤں کے درمیان طے پانے والے شیڈول کے مطابق بیرسٹر گوہر اور اسپیکر ایاز صادق کی ملاقات کل پارلیمنٹ ہاؤس میں ہوگی، جس میں ملک کی مجموعی سیاسی صورتحال اور پارلیمانی امور پر تفصیلی تبادلہ خیال کیا جائے گا۔

ذرائع کا بتانا ہے کہ اس ملاقات کے دوران چیئرمین پی ٹی آئی بیرسٹر گوہر اسپیکر قومی اسمبلی سے موجودہ کشیدہ سیاسی صورتحال میں اپنا فعال کردار ادا کرنے کی درخواست کریں گے۔ دوسری جانب، اسپیکر قومی اسمبلی سردار ایاز صادق اپنے طے شدہ پروگرام کے تحت کل گوجرانوالہ کا دورہ بھی کریں گے، جہاں وہ مسلم لیگ (ن) کے رہنما محمود بشیر ورک کے انتقال پر ان کے سوگوار اہل خانہ سے تعزیت اور فاتحہ خوانی کریں گے۔