دو چینی پانڈا 10 سالہ قیام کے لیے امریکا روانہ، چین کی ’پانڈا ڈپلومیسی‘ کیا ہے؟

چین کے شہر چینگدو سے دو دیوہیکل پانڈا 10 سالہ طویل قیام کے لیے امریکی ریاست جارجیا کے شہر اٹلانٹا روانہ کر دیے گئے ہیں۔ چینی حکام کے مطابق اتوار کی صبح ‘پنگ پنگ’ اور ‘فو شوانگ’ نامی ان دونوں پانڈاؤں کو خصوصی چارٹرڈ پرواز کے ذریعے چینگدو شوانگ لیو انٹرنیشنل ایئرپورٹ سے اٹلانٹا کے لیے روانہ کیا گیا۔ روانگی سے قبل ‘چینگدو ریسرچ بیس آف جائنٹ پانڈا بریڈنگ’ میں ایک پروقار الوداعی تقریب کا انعقاد بھی کیا گیا، جبکہ طویل سفر کے دوران ان کی صحت اور ذہنی سکون کو برقرار رکھنے کے لیے تازہ بانس، کونپلیں، سیب اور ادویات فراہم کی گئی ہیں۔ پرواز کے دوران چینی و امریکی ماہرین ان کی دیکھ بھال کریں گے، جبکہ اٹلانٹا پہنچنے پر انہیں ابتدا میں قرنطینہ میں رکھ کر طبی معائنہ کیا جائے گا۔

یہ پیش رفت چین کی مشہور ‘پانڈا ڈپلومیسی’ کا حصہ ہے، جس کے تحت بیجنگ انتظامیہ دنیا بھر کے ممالک کے ساتھ تعلقات میں بہتری، ثقافتی کشش اور تحفظِ جنگلی حیات کے فروغ کے لیے ان نایاب جانوروں کو معاہدوں کے تحت غیر ملکی چڑیا گھروں کو بھیجتی ہے۔ اس تاریخی روایت کو 1972 میں اس وقت عالمی شہرت ملی جب امریکی صدر رچرڈ نکسن کے دورۂ چین کے بعد بیجنگ نے امریکہ کو دو پانڈا تحفے میں دیے تھے۔ 1984 کے بعد سے چین نے پانڈاز کو مستقل تحفے کے بجائے تحقیقاتی معاہدوں کے تحت بھیجنا شروع کیا، جن کے تحت بیرونِ ملک پیدا ہونے والے پانڈا کے بچے بھی چینی ملکیت ہی رہتے ہیں اور بعد میں چین واپس بھیجے جاتے ہیں۔