جولائی میں حادثے کا شکار K2 ایئرویز کے کارگو طیارے کا بلیک باکس تلاش، پاک بحریہ کی سمندر میں تاریخ ساز کامیابی

رواں سال جولائی میں K2 ایئرویز کے کارگو طیارے کو پیش آنے والے ہولناک حادثے کے بعد، پاک بحریہ نے سمندر میں ایک اور تاریخ ساز اور پیچیدہ آپریشن مکمل کرتے ہوئے طیارے کے بلیک باکس کا مقام کامیابی سے تلاش کر لیا ہے۔

پاک بحریہ کی جانب سے گزشتہ دو ماہ سے طیارے کے زیرِ آب ملبے کی تلاش کے لیے مسلسل اور وسیع پیمانے پر سرچ آپریشن جاری تھا۔ انتہائی مشکل اور گہرے سمندر کی پیچیدہ صورتحال کے باوجود پاک بحریہ کے ماہر عملے نے 3,200 میٹر کی گہرائی میں طیارے کے بلیک باکس کے مقام کی دقیق نشاندہی کی۔ اس مشکل ترین مشن میں پاک بحریہ کے جہازوں نے نیشنل انجینئرنگ اینڈ سائنٹفک کمیشن (NESCOM) کے تیار کردہ جدید ترین ملکی آلات اور ٹیکنالوجی کا بھرپور استعمال کیا۔

پاک بحریہ کی جانب سے طیارے کے بلیک باکس کی کامیاب نشاندہی سے متعلق تمام تکنیکی معلومات اور کوآرڈینیٹس باضابطہ طور پر بیورو آف ایئر سیفٹی انوسٹیگیشن کے حوالے کر دیے گئے ہیں تاکہ حادثے کی حتمی وجوہات جاننے میں مدد مل سکے۔ دفاعی تجزیہ کاروں کے مطابق، سمندر کی اس قدر اتھاہ گہرائی میں بلیک باکس کی تلاش اور نشاندہی کا یہ کارنامہ پاک بحریہ کی تاریخ میں اپنی نوعیت کا پہلا اور منفرد آپریشن ہے، جس نے ایک بار پھر بحریہ کی پیشہ ورانہ صلاحیتوں کا لوہا منوا لیا ہے۔