چین پاکستان میں جدید طرز کے لا انفورسمنٹ سینٹر کے قیام میں تعاون کرے گا

وفاقی وزیر داخلہ محسن نقوی سے چین کے نائب وزیر برائے پبلک سیکیورٹی گاو چی (Gao Qi) نے اعلیٰ سطح پر ملاقات کی، جس میں پاک چین دوطرفہ تعلقات، انسدادِ دہشت گردی اور انسدادِ منشیات کے حوالے سے مشترکہ اقدامات پر تفصیلی تبادلہ خیال کیا گیا۔ ملاقات میں دونوں ممالک کے درمیان پولیس ٹریننگ ایکسچینج پروگرامز اور جدید تکنیکی آلات کے شعبے میں تعاون بڑھانے پر مکمل اتفاق کیا گیا۔ اس موقع پر چین نے پاکستان میں جدید طرز کے ایک عالمی معیار کے لا انفورسمنٹ سینٹر کے قیام میں مکمل تعاون فراہم کرنے کی باضابطہ آمادگی ظاہر کی۔

چینی نائب وزیر پبلک سیکیورٹی گاو چی نے دہشت گردی کے خلاف پاکستان کی عظيم قربانیوں، سیکیورٹی فورسز کی پیشہ ورانہ صلاحیتوں اور غیر متزلزل عزم کو زبردست الفاظ میں سراہا۔ وفاقی وزیر داخلہ محسن نقوی نے چینی وفد کا خیرمقدم کرتے ہوئے کہا کہ پاکستان میں قائم ہونے والا یہ جدید لا انفورسمنٹ سینٹر پاک چین لازوال دوستی کی ایک اور روشن اور جدید علامت ثابت ہوگا۔

محسن نقوی نے مزید کہا کہ جدید نوعیت کے سیکیورٹی چیلنجز سے مؤثر طریقے سے نمٹنے کے لیے چینی ‘اے آئی بیسڈ’ (مصنوعی ذہانت) ٹیکنالوجی اور آلات سے انتہائی مدد مل سکتی ہے۔ انہوں نے اس عزم کا اعادہ کیا کہ پاکستان چین کے ساتھ اپنی داخلی سلامتی اور لا انفورسمنٹ ادارے کی جدید کاری سے متعلق دوطرفہ تعاون کو نئی بلندیوں تک لے جانے اور باہمی اشتراکِ عمل کو مزید وسعت دینے کے لیے مکمل طور پر پرعزم ہے۔