پٹرولیم لیوی کا خاتمہ چاہیے، خیرات نہیں، حافظ نعیم الرحمان

امیر جماعت اسلامی حافظ نعیم الرحمان نے حکومت سے پیٹرولیم مصنوعات پر عائد لیوی کے فوری اور مکمل خاتمے کا مطالبہ کرتے ہوئے واضح کیا ہے کہ عوام کو خیرات یا معمولی ریلیف دینے کے بجائے اصل مسئلہ حل کیا جائے۔ انہوں نے کہا کہ قوم اس وقت شدید معاشی عذاب اور مہنگائی میں مبتلا ہے جبکہ غلط پالیسیوں کے باعث معیشت تباہ ہو رہی ہے۔ حکومت سے مذاکرات کے حوالے سے گفتگو کرتے ہوئے انہوں نے بتایا کہ گفتگو کا اگلا دور آج شام 6 بجے طے ہے، تاہم جماعت اسلامی کا حکومت سے بنیادی اور واحد مطالبہ پیٹرولیم لیوی کا خاتمہ ہے۔

حافظ نعیم الرحمان نے حکومتی مؤقف کو تنقید کا نشانہ بناتے ہوئے کہا کہ حکومت 1,567 ارب روپے لیوی کی مد میں جمع کر کے عوام کو محض 25 ارب روپے کا ریلیف دینے کا ڈرامہ کر رہی ہے۔ انہوں نے خبردار کیا کہ حکومت مذاکرات کو ٹالنے کی کوشش نہ کرے، اگر ہمارے تمام مطالبات تسلیم نہ کیے گئے تو جماعت اسلامی مذاکرات کا طریقہ کار ختم کر دے گی اور اس کے بعد تمام فیصلے سڑکوں پر ہوں گے۔ انہوں نے کہا کہ اسلام آباد مارچ کے بعد حکومت کو عوامی جدوجہد کی طاقت کا اندازہ ہو چکا ہے، اس لیے لاک ڈاؤن یا دکانداروں پر دباؤ ڈالنے کی پالیسی کو فوری طور پر مسترد کیا جائے۔

امیر جماعت اسلامی نے ڈیزل کی قیمتوں میں کمی نہ کرنے پر شدید تشویش کا اظہار کرتے ہوئے کہا کہ ٹرانسپورٹ، زراعت اور صنعتی شعبہ ڈیزل پر چلتا ہے اور پیٹرولیم لیوی کی وجہ سے ہر بنیادی چیز کی قیمت میں اضافہ ہو رہا ہے۔ انہوں نے روزانہ کی بنیاد پر پیٹرول کی قیمتیں بڑھانے کا نظام ختم کرنے، سود کی شرح کم کرنے، اور سرکاری اخراجات میں فوری کمی کا مطالبہ کیا۔ انہوں نے مزید کہا کہ وزراء اور افسران کے لیے 1300 سی سی گاڑیوں کی حد مقرر کی جائے اور سرکاری طیاروں کے استعمال کے تمام ریکارڈ کا قوم کے سامنے حساب لایا جائے۔