جنگ کے اثرات: عالمی منڈی میں خام تیل کی قیمتوں میں اتار چڑھاؤ جاری

امریکہ اور ایران کے درمیان پیدا ہونے والی شدید عسکری و سیاسی کشیدگی کے باعث عالمی منڈی میں خام تیل کی قیمتوں میں غیر یقینی صورتحال اور شدید اتار چڑھاؤ کا سلسلہ جاری ہے۔ عالمی مارکیٹ میں تجارتی سیشن کے دوران امریکی خام تیل (WTI) کی قیمت 104 ڈالر فی بیرل کی سطح پر ریکارڈ کی گئی، جبکہ برینٹ کروڈ (Brent Crude) 108 ڈالر اور یو اے ای کا ‘مربن’ خام تیل 123 ڈالر فی بیرل کی اونچی سطح پر ٹریڈ ہوتا ہوا دیکھا گیا۔

عالمی منڈی میں ایندھن کی قیمتوں کے اس مسلسل دباؤ کا براہِ راست اثر پاکستان میں بھی دیکھا جا رہا ہے، جہاں مقامی سطح پر پیٹرولیم مصنوعات کے نرخ روز بروز نئی ریکارڈ سطح کو چھو رہے ہیں۔ گزشتہ رات حکومت کی جانب سے کیے گئے تازہ ترین اضافے کے بعد ملک بھر میں پیٹرولیم مصنوعات کی قیمتوں کو نیا پر لگ گئے ہیں۔

حکومتی اعلان کے مطابق ملک میں ڈیزل کی قیمت میں بھاری اضافے کے بعد اس کی نئی قیمت 415 روپے 83 پیسے فی لیٹر ہو گئی ہے، جبکہ پیٹرول کی قیمت بھی بڑھ کر 384 روپے 34 پیسے فی لیٹر کی بلند ترین سطح پر پہنچ چکی ہے۔ معاشی ماہرین کا کہنا ہے کہ اگر بین الاقوامی سطح پر ایندھن کا بحران برقرار رہا تو آنے والے دنوں میں مہنگائی اور ٹرانسپورٹ کے اخراجات میں مزید اضافہ دیکھنے کو مل سکتا ہے۔