مریم نواز کی زیر صدارت اجلاس، صحت کے 4 بڑے منصوبوں کا جائزہ

لاہور: وزیراعلیٰ پنجاب مریم نواز شریف نے صوبے میں جاری چار بڑے ہیلتھ پراجیکٹس کا جائزہ لیتے ہوئے عوام کو علاج کی بہترین سہولیات کی فراہمی کے عزم کا اعادہ کیا ہے۔ اجلاس میں بتایا گیا کہ چلڈرن ہارٹ سرجری پروگرام کے تحت اب تک 11 ہزار سے زائد بچوں کے دل کے کامیاب آپریشن کیے جا چکے ہیں، جن میں سے 3 ہزار 800 سے زائد بچوں کا علاج سرکاری خرچ پر نجی ہسپتالوں سے کروایا گیا تاکہ ویٹنگ لسٹ کو ختم کیا جا سکے۔

وزیراعلیٰ نے سی ایم سپیشل ٹرانسپلانٹ پروگرام کی کارکردگی کو سراہتے ہوئے بتایا کہ اب تک 1,574 مریضوں کے پیچیدہ ٹرانسپلانٹ مکمل ہو چکے ہیں۔ ان میں سب سے اہم لیور ٹرانسپلانٹ ہے، جس کے ایک کیس پر حکومت تقریباً 65 لاکھ روپے خرچ کر رہی ہے۔ اس کے علاوہ گردوں، آنکھوں (Cornea) اور بون میرو کی پیوند کاری بھی مکمل طور پر مفت کی جا رہی ہے۔ مریم نواز شریف کا کہنا تھا کہ “غریب ہو یا امیر، سب بچے میرے اپنے ہیں،” اور حکومت کا مقصد ہر شہری تک معیاری صحت کی رسائی یقینی بنانا ہے۔