درآمدی ایندھن پر چلنے والے پلانٹس بند، لاہور میں غیر اعلانیہ لوڈشیڈنگ، شہری پریشان

لاہور الیکٹرک سپلائی کمپنی (لیسکو) کے درآمدی ایندھن سے چلنے والے بجلی گھروں کی بندش کے باعث شہر اور گردونواح میں غیر اعلانیہ لوڈشیڈنگ کا سلسلہ شروع ہوگیا ہے۔

ذرائع کے مطابق ان پلانٹس کی بندش سے قومی گرڈ سے بجلی کی فراہمی متاثر ہوئی ہے، جس کے نتیجے میں تقسیم کار کمپنیوں کو کم بجلی مل رہی ہے۔ بجلی کی دستیابی میں کمی کے باعث لیسکو کے مختلف علاقوں میں صارفین کو طویل بندش کا سامنا کرنا پڑ رہا ہے۔

شہری علاقوں میں روزانہ تین سے چار گھنٹے جبکہ دیہی علاقوں میں چار سے پانچ گھنٹے تک غیر اعلانیہ لوڈشیڈنگ کی جارہی ہے۔ خاص طور پر شام اور رات کے اوقات میں بجلی کی بندش میں اضافہ دیکھا جا رہا ہے۔

ذرائع کا کہنا ہے کہ دن کے وقت شمسی نظام کے باعث طلب کسی حد تک پوری ہو جاتی ہے، تاہم رات کے وقت طلب بڑھ کر دو ہزار نو سو نوے میگاواٹ تک پہنچ جاتی ہے۔ اس کے برعکس نیشنل پاور کنٹرول سینٹر (این پی سی سی) کی جانب سے صرف دو ہزار میگاواٹ بجلی فراہم کی جا رہی ہے، جس سے ایک ہزار میگاواٹ تک کا شارٹ فال پیدا ہو گیا ہے۔