اسحاق ڈار 2 روزہ سرکاری دورے پر شنگھائی پہنچ گئے

پاکستان کے نائب وزیراعظم اور وزیر خارجہ اسحاق ڈار دو روزہ سرکاری دورے پر چین کے شہر شنگھائی پہنچ گئے ہیں، جہاں ہوائی اڈے پر شنگھائی کے نائب میئر اور اعلیٰ چینی حکام نے ان کا پرتپاک استقبال کیا۔ اسحاق ڈار ۱۷ جولائی کو شنگھائی میں منعقد ہونے والی “ورلڈ آرٹیفیشل انٹیلی جنس کانفرنس” (WAIC) کی افتتاحی تقریب میں پاکستان کی نمائندگی کریں گے۔ اس دورے کی خاص بات یہ ہے کہ پاکستان بانی رکن کے طور پر “ورلڈ آرٹیفیشل انٹیلی جنس کوآپریشن آرگنائزیشن” (WAICO) کے قیام کے تاریخی معاہدے پر باقاعدہ دستخط کرے گا۔ دورے کے دوران نائب وزیراعظم مختلف ممالک کے وزرائے خارجہ، اہم کاروباری شخصیات اور اعلیٰ حکام سے دوطرفہ ملاقاتیں بھی کریں گے، جن میں باہمی تعاون، ٹیکنالوجی کی منتقلی اور علاقائی و عالمی امور پر تفصیلی تبادلہ خیال کیا جائے گا۔