خطے کی کشیدگی سے نمٹنے کے لئے مکمل تیاری رکھیں: وزیراعظم

وزیراعظم محمد شہباز شریف کی زیرِ صدارت خطے میں جاری کشیدگی کے ملکی معیشت پر اثرات کا جائزہ لینے کے لیے ایک اہم اجلاس منعقد ہوا، جس میں وفاقی وزراء احد خان چیمہ، محمد اورنگزیب، اویس لغاری اور گورنر اسٹیٹ بینک جمیل احمد سمیت اعلیٰ حکام نے شرکت کی۔ اجلاس میں سادگی اور کفایت شعاری کے اقدامات پر تفصیلی رپورٹ پیش کی گئی۔ وزیراعظم نے ہدایت کی کہ خطے میں غیر یقینی صورتحال کے پیشِ نظر ہر ممکنہ چیلنج سے نمٹنے کے لیے مکمل تیاری رکھی جائے اور ضرورت پڑنے پر بروقت اقدامات کے لیے جامع لائحہ عمل مرتب کیا جائے۔ شہباز شریف نے پٹرولیم اور توانائی کی بچت کے لیے قومی مہم میں عوام کے بھرپور تعاون کو سراہا اور کہا کہ حکومتی سبسڈی کے باعث عام آدمی، رکشہ و موٹر سائیکل سواروں اور ٹرانسپورٹرز کو ایندھن کی قیمتوں میں اضافے کے اثرات سے محفوظ رکھا گیا ہے۔ انہوں نے صوبائی حکومتوں کو پٹرولیم مصنوعات کی مصنوعی قلت پیدا کرنے والوں کے خلاف سخت قانونی کارروائی کا حکم بھی دیا۔ اجلاس کو بریفنگ میں یقین دہانی کرائی گئی کہ ملک میں پٹرولیم مصنوعات کے وافر ذخائر موجود ہیں اور مستقبل کی سپلائی لائن کو مکمل طور پر محفوظ بنا لیا گیا ہے۔