سی سیکشنز کی فوٹیج بنانے کا معاملہ، 4 ڈاکٹرز کی پوسٹ گریجویٹ ٹریننگ معطل

لاہور: لاہور کے تاریخی لیڈی ولنگڈن ہسپتال میں انسانیت سوز واقعہ سامنے آیا ہے جہاں آپریشن تھیٹر میں دورانِ سرجری دو سی سیکشنز (C-Sections) کی ویڈیو بنائی گئی اور اسے ‘مقابلہ’ قرار دیا گیا۔ سوشل میڈیا پر وائرل ہونے والی ویڈیو میں ڈاکٹروں کو یہ بحث کرتے ہوئے سنا جا سکتا ہے کہ پہلے آپریشن کون مکمل کرتا ہے۔ حکومتِ پنجاب نے اس غیر پیشہ ورانہ رویے کا سخت نوٹس لیتے ہوئے فوری تادیبی کارروائی کا آغاز کر دیا ہے۔

صوبائی وزیرِ صحت خواجہ سلمان رفیق نے اس عمل کو طبی اخلاقیات کی سنگین خلاف ورزی اور مریض کے وقار کی توہین قرار دیا ہے۔ محکمہ اسپیشلائزڈ ہیلتھ کیئر نے فوری طور پر ویڈیو میں موجود چار لیڈی ڈاکٹرز، جن میں ڈاکٹر طیبہ فاطمہ طور، ڈاکٹر ماہم امین، ڈاکٹر زینب طاہر اور ڈاکٹر عائشہ افضل شامل ہیں، کی پوسٹ گریجویٹ ٹریننگ معطل کر دی ہے۔

سیکرٹری صحت عظمت محمود کے مطابق، ہسپتال کی ایم ایس ڈاکٹر فرح انعام اور گائنی ڈیپارٹمنٹ کی سربراہ پروفیسر ڈاکٹر عظمیٰ حسین سے تحریری جواب طلب کر لیا گیا ہے۔ انہوں نے واضح کیا کہ مقررہ وقت پر تسلی بخش جواب نہ ملنے کی صورت میں ذمہ داران کے خلاف سخت قانونی و محکمانہ کارروائی عمل میں لائی جائے گی۔ اس واقعے نے ہسپتالوں میں مریضوں کی رازداری اور ڈاکٹروں کی پیشہ ورانہ مہارت پر کئی سوالات کھڑے کر دیے ہیں۔