کراچی: مائی کلاچی روڈ سے ملنے والی چار لاشوں کا پوسٹ مارٹم مکمل

کراچی کے علاقے مائی کلاچی روڈ سے ملنے والی چار افراد کی لاشوں کا پوسٹ مارٹم مکمل کر لیا گیا ہے۔ پولیس سرجن ڈاکٹر سمعیہ طارق کے مطابق لاشوں سے تمام ضروری سیمپلز حاصل کر لیے گئے ہیں، تاہم موت کی اصل وجوہات کا تعین پوسٹ مارٹم رپورٹ آنے کے بعد ہی ممکن ہو سکے گا۔

ڈاکٹر سمعیہ طارق نے بتایا کہ پہلی لاش 13 سے 14 سال کے لڑکے کی ہے، جس کے سر، چہرے اور گردن پر تشدد کے واضح نشانات موجود ہیں۔ دوسری لاش 10 سالہ بچے کی ہے جس کا گلا یا ٹھوڑی کے قریب گہرا زخم پایا گیا ہے۔

پولیس سرجن کے مطابق تیسری لاش 14 سے 15 سالہ لڑکی کی ہے، جس کے سر، چہرے اور گردن پر بھی تشدد کے نشانات دیکھے گئے ہیں، جبکہ چوتھی لاش تقریباً 40 سالہ خاتون کی ہے جس کے سر پر متعدد زخموں کے آثار موجود ہیں۔

ڈاکٹر سمعیہ طارق کا کہنا ہے کہ تمام لاشوں کے نمونے حاصل کر کے مزید تجزیے کے لیے بھیج دیے گئے ہیں۔ پوسٹ مارٹم کے بعد لاشوں کو سرد خانے منتقل کر دیا گیا ہے۔

پولیس کا کہنا ہے کہ واقعے کی تحقیقات جاری ہیں اور پوسٹ مارٹم رپورٹ کی روشنی میں مزید پیش رفت کی جائے گی۔