ایران نے چینی جاسوس سیٹلائٹ کے ذریعے مشرق وسطیٰ میں امریکی اڈوں کو نشانہ بنایا، خفیہ دستاویزات میں انکشاف

برطانوی جریدے فنانشل ٹائمز نے اپنی ایک حالیہ رپورٹ میں سنسنی خیز انکشاف کیا ہے کہ ایران نے چین کے جدید جاسوس سیٹلائٹ “TEE-01B” کا استعمال کرتے ہوئے مشرقِ وسطیٰ میں امریکی فوجی تنصیبات کو نشانہ بنایا۔ رپورٹ کے مطابق، پاسدارانِ انقلاب (IRGC) کی ایرو اسپیس فورس نے 2024 کے اواخر میں یہ سیٹلائٹ حاصل کی تھی، جسے چین سے خلا میں بھیجنے کے بعد باقاعدہ طور پر ایران کے حوالے کر دیا گیا تھا۔ اس ٹیکنالوجی کی مدد سے ایرانی فوجی کمانڈرز نے مارچ میں ہونے والے ڈرون اور میزائل حملوں سے قبل اور بعد میں امریکی اڈوں کی انتہائی باریک بینی سے نگرانی کی۔

رپورٹ میں بتایا گیا ہے کہ اس چینی سیٹلائٹ نے سعودی عرب کے پرنس سلطان ایئر بیس سمیت اردن، بحرین، عراق، کویت اور عمان میں واقع اہم امریکی فوجی مراکز کی تصاویر حاصل کیں۔ خاص طور پر 14 مارچ کو سعودی عرب میں امریکی طیاروں کو نشانہ بنانے سے قبل 13، 14 اور 15 مارچ کو اس مقام کی ہائی ریزولوشن تصاویر لی گئیں۔ اس کے علاوہ خلیجی ممالک کے سویلین انفراسٹرکچر، جیسے متحدہ عرب امارات کی بندرگاہیں اور بحرین کے صنعتی پلانٹس کو بھی مانیٹر کیا گیا۔فنانشل ٹائمز کے مطابق، ایران کے سابقہ سیٹلائٹ نظام کے مقابلے میں یہ نیا سسٹم اسے اہداف کی درست شناخت اور حملوں کی مؤثر منصوبہ بندی میں غیر معمولی مدد فراہم کر رہا ہے۔ ایران نے اس پورے سسٹم بشمول لانچنگ اور تکنیکی معاونت کے لیے 36.6 ملین ڈالر ادا کیے۔ دوسری جانب، چین نے ان الزامات کو یکسر مسترد کرتے ہوئے کہا ہے کہ وہ غیر مصدقہ معلومات پھیلانے کے خلاف ہے اور ہمیشہ عالمی امن کے لیے کام کرتا ہے۔ ماہرین اس پیش رفت کو مشرقِ وسطیٰ میں طاقت کے توازن میں بڑی تبدیلی اور امریکا و چین کے درمیان سرد جنگ کے ایک نئے محاذ کے طور پر دیکھ رہے ہیں۔