امریکا نے ایرانی تیل کی فروخت کی اجازت دینے والا لائسنس منسوخ کردیا

امریکا نے آبنائے ہرمز میں ایران کی حالیہ کارروائیوں پر سخت ردعمل دیتے ہوئے ایرانی تیل کی فروخت کی اجازت دینے والا جنرل لائسنس منسوخ کر دیا ہے۔

غیر ملکی خبر رساں اداروں کے مطابق، امریکی محکمہ خزانہ کے آفس آف فارن ایسیٹس کنٹرول (OFAC) کی جانب سے جاری کردہ ایک بیان میں کہا گیا ہے کہ 7 جولائی 2026 سے ‘جنرل لائسنس ایکس’ (General License X) کو منسوخ کر دیا گیا ہے اور اس کی جگہ اب ‘جنرل لائسنس ایکس ون’ (General License X-1) نافذ العمل ہوگا۔

یاد رہے کہ امریکا نے جنگ کے خاتمے سے متعلق حوصلہ افزا مذاکرات کے بعد رواں سال جون میں ایرانی تیل کی برآمدات پر عائد بعض پابندیوں میں جزوی نرمی کی تھی۔ اس نرمی کے تحت ایران کو 60 روز کے لیے پابندیوں سے استثنیٰ دیا گیا تھا، جس کے تحت ایرانی تیل کی پیداوار، ترسیل اور فروخت کی اجازت دی گئی تھی۔

خبر رساں ادارے ‘رائٹرز’ کے مطابق، امریکی حکام کا کہنا ہے کہ آبنائے ہرمز میں ایران کی حالیہ کارروائیاں امریکا کے لیے مکمل طور پر ناقابل قبول ہیں اور ایران کو ان اقدامات کے نتائج بھگتنا ہوں گے۔ لائسنس کی اس اچانک منسوخی کو ایران پر دوبارہ اقتصادی دباؤ بڑھانے کی بڑی امریکی کوشش کے طور پر دیکھا جا رہا ہے۔