ایران میں قشم جزیرے، سیریک، بندر عباس میں دھماکے سنے گئے: ایرانی میڈیا

ایران کے جنوبی ساحلی علاقوں اور جزائر میں اچانک زور دار دھماکوں کی آوازیں سنی گئی ہیں، جس کے بعد مقامی آبادی میں تشویش کی لہر دوڑ گئی ہے۔ ایرانی حکام نے دھماکوں کی تصدیق کرتے ہوئے تحقیقات کا آغاز کر دیا ہے۔

ایرانی میڈیا کے مطابق ملک کے جنوبی ساحلی شہر ‘سیریک’ میں یکے بعد دیگرے کئی زور دار دھماکے سنے گئے۔ ان دھماکوں کی شدت اس قدر زیادہ تھی کہ دور دور تک آواز گونج اٹھی۔ واقعے کے فوراً بعد مقامی انتظامیہ اور سیکیورٹی حکام دھماکوں کی اصل نوعیت اور کسی بھی ممکنہ نقصان کا پتا لگانے کی کوشش کر رہے ہیں۔

سیریک کے علاوہ، تزویراتی لحاظ سے انتہائی اہم پوزیشن پر واقع ‘قشم جزیرے’ (Qeshm Island) اور اہم ساحلی تجارتی مرکز ‘بندر عباس’ میں بھی اسی وقت شدید دھماکوں کی آوازیں رپورٹ ہوئی ہیں۔  ابتدائی رپورٹس کے مطابق، ان تمام علاقوں میں بیک وقت سنے جانے والے دھماکوں کی وجوہات تاحال معلوم نہیں ہو سکیں اور نہ ہی کسی جانی یا مالی نقصان کی فوری تصدیق کی گئی ہے۔ سیکیورٹی ذرائع کا کہنا ہے کہ معاملے کو ہر زاویے سے دیکھا جا رہا ہے۔