واشنگٹن نے ایرانی تیل کی فروخت پر عائد پابندیوں میں عارضی نرمی ختم کر کے مفاہمتی یادداشت کی کھلی خلاف ورزی کی ہے۔ ایران

ایران نے امریکا پر دوطرفہ معاہدے سے انحراف کا الزام عائد کرتے ہوئے کہا ہے کہ واشنگٹن نے ایرانی تیل کی فروخت پر عائد پابندیوں میں عارضی نرمی ختم کر کے مفاہمتی یادداشت کی کھلی خلاف ورزی کی ہے۔

ایرانی وزارتِ خارجہ کی جانب سے جاری کردہ ایک سخت بیان میں امریکی محکمہ خزانہ کے حالیہ اقدام کی شدید مذمت کی گئی ہے۔ بیان میں موقف اختیار کیا گیا ہے کہ امریکا نے پابندیاں دوبارہ نافذ کر کے دونوں ممالک کے مابین طے پانے والی مفاہمتی یادداشت کے آرٹیکل 10 کو پامال کیا ہے۔ ایرانی وزارتِ خارجہ نے اسے 18 جون کو طے پانے والی مفاہمت کی واضح خلاف ورزی قرار دیا ہے۔

ایران کا کہنا ہے کہ معاہدے پر دستخط کے محض 20 روز سے بھی کم عرصے کے اندر اٹھایا گیا یہ امریکی قدم موجودہ حکومت کی بدنیتی کو ظاہر کرتا ہے اور اس سے ایک بار پھر ثابت ہو گیا ہے کہ واشنگٹن پر کسی بھی صورت اعتماد نہیں کیا جا سکتا۔

ایرانی وزارتِ خارجہ نے مزید سنگین الزام عائد کرتے ہوئے کہا کہ امریکا نے اس مفاہمتی یادداشت کی متعدد شقوں کی بارہا خلاف ورزی کی ہے، جس کے لیے کچھ اقدامات براہِ راست کیے گئے جبکہ بعض اقدامات مبینہ طور پر لبنان میں اسرائیلی کارروائیوں کے ذریعے سرانجام دیے گئے۔ اس نئے تنازع کے بعد دونوں ممالک کے درمیان سفارتی بحران مزید سنگین ہونے کا خدشہ ہے۔