آبنائے ہرمز میں آئل ٹینکر کو نامعلوم پروجیکٹائل سے نشانہ بنایا گیا، برطانوی میری ٹائم ایجنسی

برطانوی میری ٹائم ٹریڈ آپریشنز (UKMTO) ایجنسی نے تصدیق کی ہے کہ منگل کے روز تزویراتی لحاظ سے انتہائی اہم بحری گزرگاہ ‘آبنائے ہرمز’ سے گزرنے والے ایک تجارتی آئل ٹینکر کو نامعلوم پروجیکٹائل (میزائل یا ڈرون) سے نشانہ بنایا گیا ہے۔

برطانوی میری ٹائم ایجنسی کے مطابق، اس حملے کے نتیجے میں آئل ٹینکر کو جزوی نقصان پہنچا ہے، تاہم خوش قسمتی سے اس واقعے میں عملے کا کوئی جانی نقصان نہیں ہوا اور نہ ہی سمندر میں تیل کے اخراج کی کوئی اطلاع ملی ہے۔ جہاز محفوظ طریقے سے اپنی منزل کی جانب گامزن ہے۔

دوسری جانب، خلیجی ملک قطر نے آبنائے ہرمز میں آئل ٹینکر پر ہونے والے اس حملے پر شدید ردعمل کا اظہار کرتے ہوئے اس کا ذمہ دار براہِ راست ایران کو قرار دیا ہے۔ قطری وزارتِ خارجہ کے ترجمان ماجد الانصاری نے اپنے ایک خصوصی بیان میں کہا کہ آئل ٹینکر کو نشانہ بنانا بین الاقوامی بحری جہاز رانی، عالمی توانائی کی بلاتعطل فراہمی اور علاقائی سلامتی کے خلاف کھلی جارحیت ہے۔

ترجمان نے مزید واضح کیا کہ یہ حملہ بین الاقوامی قوانین، بالخصوص بین الاقوامی آبی گزرگاہوں میں آزادانہ، محفوظ اور خودمختار بحری آمدورفت سے متعلق مروجہ قوانین کی سنگین خلاف ورزی ہے، جس سے خطے میں کشیدگی مزید پھیلے گی۔