ایران کے خلاف طاقتور حملوں کا سلسلہ شروع کر دیا ہے، امریکی سینٹرل کمانڈ

امریکی سینٹرل کمانڈ (سینٹ کام) نے باقاعدہ اعلان کیا ہے کہ امریکا کی جانب سے ایران کے خلاف طاقتور اور شدید حملوں کا سلسلہ شروع کر دیا گیا ہے۔ یہ کارروائی بین الاقوامی بحری گزرگاہوں میں تجارتی جہازوں پر ہونے والے حملوں کے جواب میں کی جا رہی ہے۔

امریکی سینٹرل کمانڈ نے سوشل میڈیا پلیٹ فارم ‘ایکس’ (سابقہ ٹویٹر) پر جاری کردہ اپنے ایک اہم بیان میں واضح کیا کہ ایران پر یہ فوجی حملے اس لیے کیے جا رہے ہیں تاکہ بین الاقوامی آبی گزرگاہ میں معصوم شہریوں پر مشتمل تجارتی جہازوں کو نشانہ بنانے کی ایران سے بھاری قیمت وصول کی جا سکے۔

سینٹ کام کے مطابق، یہ امریکی کارروائی  انتہائی اہم بحری راستے ‘آبنائے ہرمز’ (Strait of Hormuz) سے گزرنے والے 3 تجارتی جہازوں پر ایران کے مبینہ حملوں کے جواب میں کی جا رہی ہے۔ سینٹ کام نے اپنے بیان میں مزید کہا کہ تجارتی جہازوں پر ایران کی جانب سے کی جانے والی مبینہ جارحیت سراسر بلاجواز، انتہائی خطرناک اور پہلے سے طے شدہ جنگ بندی کی واضح خلاف ورزی تھی۔ اس اقدام کے بعد خطے میں سیکیورٹی کی صورتحال شدید تشویشناک ہو گئی ہے۔