موٹاپے اور ذیابیطس کی نئی دوا آزمائش میں کامیاب

موٹاپے اور ٹائپ 2 ذیابیطس (Diabetes) کے شکار افراد کے لیے ایک بڑی خوشخبری سامنے آئی ہے۔ ایک ایسی نئی انقلابی دوا متعارف کرائی جا رہی ہے جس کی مدد سے مریض بغیر کسی سرجری کے وزن میں نمایاں کمی اور شوگر کو نارمل سطح پر لا سکیں گے۔

موٹاپے اور ٹائپ ٹو ذیابیطس کے علاج کے لیے تیار کی جانے والی اس نئی دوا ‘ایچ آر ایس 7535’ (HRS9535) نے اپنے کلینیکل آزمائشوں کے آخری مرحلے (فیز تھری) میں اہم ہدف حاصل کر لیا ہے، جس کے بعد اسے طبی دنیا میں ایک انتہائی امید افزا پیش رفت قرار دیا جا رہا ہے۔

رائٹرز کی رپورٹ کے مطابق، امریکی بائیوفارما کمپنی ‘کیلیرا تھیراپیوٹکس’ نے بتایا کہ اس کی شراکت دار چینی دوا ساز کمپنی ‘جیانگسو ہینگروئی فارماسیوٹیکل’ کی جانب سے چین میں کیے گئے دو الگ الگ فیز تھری کلینیکل ٹرائلز میں اس دوا نے موٹاپے اور ذیابیطس، دونوں کے علاج میں انتہائی مثبت نتائج دیے ہیں۔

‘ایچ آر ایس 7535’ (جسے سیفی گلپرون بھی کہا جاتا ہے) ایک جدید ترین زبانی (اورل) یعنی گولی کی شکل میں کھائی جانے والی آزمائشی دوا ہے۔ کمپنی کے مطابق، موٹاپے کے شکار افراد پر کیے گئے مطالعے میں دیکھا گیا کہ 44 ہفتوں کے استعمال کے بعد شرکاء کے جسمانی وزن میں اوسطاً 10.9 فیصد جبکہ 50 ہفتوں میں 11.1 فیصد تک کمی ریکارڈ کی گئی۔

تحقیقی رپورٹ کے مطابق، اب تک چین میں 2 ہزار سے زائد افراد کو یہ دوا دی جا چکی ہے، اور خوش آئند بات یہ ہے کہ دونوں مطالعات میں جگر کو نقصان پہنچنے کے کوئی نمایاں شواہد سامنے نہیں آئے۔ یہ ایک ‘جی ایل پی ون ریسیپٹر ایگونِسٹ’ دوا ہے، جس کا مقصد جسم میں بھوک کو کم کرنا، خون میں شوگر کو متوازن رکھنا اور وزن گھٹانا ہے۔

اس دوا کو چینی کمپنی ہینگروئی فارما نے تیار کیا ہے، جبکہ 2024 میں گریٹر چائنا سے باہر اس کی فروخت اور تقسیم کے حقوق کیلیرا تھیراپیوٹکس کو دے دیے گئے تھے۔ طبی ماہرین کا کہنا ہے کہ اگر مستقبل کی آزمائشوں میں بھی یہی نتائج برقرار رہے تو یہ گولی موٹاپے اور ذیابیطس کے مریضوں کے لیے ایک آسان اور انقلابی متبادل ثابت ہوگی۔