ایران نے آبنائے ہرمز میں قطری جہاز پر حملے کے الزام کو مسترد کر دیا

ایران نے آبنائے ہرمز میں قطری آئل و ایل این جی (LNG) ٹینکر کو نشانہ بنانے کے قطر کے الزامات کو یکسر مسترد کرتے ہوئے انہیں انتہائی “حیران کن” قرار دیا ہے۔

ایرانی وزارتِ خارجہ کے ترجمان اسماعیل بقائی نے اس حوالے سے باضابطہ بیان جاری کرتے ہوئے کہا ہے کہ تہران آبنائے ہرمز میں محفوظ بحری آمدورفت کو یقینی بنانے کے لیے پوری طرح پُرعزم ہے۔ انہوں نے واضح کیا کہ ایران اس اہم سمندری گزرگاہ کے انتظام سے متعلق مفاہمتی یادداشت (ایم او یو) کے تحت اپنی تمام تر ذمہ داریاں تندہی سے پوری کر رہا ہے۔

یاد رہے کہ قطر کی جانب سے اس واقعے کا ذمہ دار ایران کو ٹھہرایا گیا تھا۔ قطر نے دوحہ میں تعینات ایرانی نائب سفیر کو وزارتِ خارجہ طلب کر کے آبنائے ہرمز کے قریب قطری ایل این جی ٹینکر کو مبینہ طور پر نشانہ بنانے کے واقعے پر شدید تشویش کا اظہار کیا اور ان کے حوالے ایک باضابطہ احتجاجی مراسلہ بھی کیا تھا۔ ایران کے حالیہ مؤقف کے بعد دونوں ممالک کے درمیان سفارتی سطح پر تناؤ میں اضافے کا خدشہ ظاہر کیا جا رہا ہے۔