عمان سے ممکنہ بحری معاہدہ آبنائے ہرمز کی فوری بحالی کی ضمانت نہیں: ایران

ایرانی سرکاری میڈیا نے واضح کیا ہے کہ اگر ایران اور عمان کے درمیان آبنائے ہرمز میں جہاز رانی کے مستقبل کے انتظامی امور سے متعلق کوئی معاہدہ طے بھی پا جاتا ہے، تو اس کا یہ مطلب ہرگز نہیں ہوگا کہ یہ اہم بین الاقوامی بحری گزرگاہ فوری طور پر تجارتی آمدورفت کے لیے دوبارہ کھول دی جائے گی۔ بین الاقوامی میڈیا رپورٹس کے مطابق ایرانی سرکاری نشریاتی ادارے (آئی آر آئی بی) نے ذرائع کے حوالے سے بتایا ہے کہ آبنائے ہرمز میں مستقبل کی بحری آمدورفت اور انتظامی طریقہ کار سے متعلق تمام تر مذاکرات صرف تہران اور مسقط کے درمیان جاری ہیں، اور ان میں امریکا کا کوئی براہ راست تعلق یا کردار نہیں ہے۔

ذرائع کے مطابق ایران اور عمان کے درمیان ممکنہ سمجھوتہ صرف مشترکہ بحری راہداری اور انتظامی طریقہ کار تک محدود ہے، جبکہ اس سٹریٹیجک گزرگاہ کو مکمل طور پر کھولنے یا بند رکھنے کا فیصلہ بالکل ایک الگ معاملہ ہے۔ ایرانی حکام کا موقف ہے کہ اگر دونوں ممالک کسی نئے بحری راستے کے قیام پر متفق بھی ہو جائیں، تب بھی آبنائے ہرمز اس وقت تک بند رہے گی جب تک امریکا اپنی مبینہ خلاف ورزیاں، فوجی مداخلت اور پابندیاں ختم نہیں کرتا۔ ایرانی میڈیا کے مطابق تہران اور مسقط کے درمیان مشترکہ بحری راہداری کے قیام پر بات چیت مثبت انداز میں آگے بڑھ رہی ہے، تاہم عمانی حکومت اور امریکی حکام کی جانب سے اس پیش رفت پر ابھی تک کوئی باضابطہ ردعمل سامنے نہیں آیا ہے۔ ماہرین کا کہنا ہے کہ عالمی سطح پر تیل اور گیس کی ترسیل کے لیے یہ انتہائی اہم ترین گزرگاہ ہے، اس لیے دنیا بھر کی توانائی منڈیاں اس معاملے پر گہری نظر رکھے ہوئے ہیں۔