شفاف انتخابات تک بڑی آئینی تبدیلی قبول نہیں: سلمان اکرم راجہ

پاکستان تحریک انصاف (پی ٹی آئی) کے سینئر رہنما سلمان اکرم راجہ نے میڈیا سے گفتگو کرتے ہوئے کہا ہے کہ ملک میں معیشت، مزدور اور کسان بدحالی کا شکار ہیں۔ انہوں نے واضح کیا کہ اگرچہ نئے صوبے بنانے پر بحث ہو سکتی ہے، لیکن جب تک ملک میں شفاف انتخابات کے نتیجے میں عوام کے حقیقی نمائندے اسمبلیوں میں نہیں آتے، اس وقت تک کوئی بھی بڑی آئینی یا سیاسی تبدیلی نہیں ہونی چاہیے۔

سلمان اکرم راجہ نے موجودہ پارلیمنٹ اور صوبائی اسمبلیوں کو مصنوعی نظام قرار دیتے ہوئے کہا کہ بانی پی ٹی آئی کو شامل کیے بغیر اور ان کی رضامندی کے بغیر کوئی اہم فیصلہ نہیں کیا جا سکتا۔ انہوں نے مطالبہ کیا کہ بانی پی ٹی آئی کو فوری طور پر ہسپتال منتقل کر کے علاج کی سہولیات دی جائیں، ان پر قائم مقدمات ختم کیے جائیں اور قومی سیاست میں ان کا کردار تسلیم کیا جائے۔ 27 ستمبر کی کال کا ذکر کرتے ہوئے انہوں نے کہا کہ یہ جدوجہد صرف ایک دن کے لیے نہیں ہوگی بلکہ اس انقلاب اور سیاسی جدوجہد میں پوری قوم کو باہر نکل کر ساتھ دینا ہوگا۔