سفارتی وفد کا این ڈی ایم اے کا دورہ، جدید ڈیزاسٹر مینجمنٹ نظام کو سراہا

ایک اعلیٰ سطح کے عالمی سفارتی وفد نے نیشنل ڈیزاسٹر مینجمنٹ اتھارٹی (NDMA) ہیڈکوارٹرز اسلام آباد میں قائم نیشنل ایمرجنسیز آپریشنز سینٹر (NEOC) کا باضابطہ دورہ کیا۔ دورے کے دوران چیئرمین این ڈی ایم اے لیفٹیننٹ جنرل انعام حیدر ملک نے وفد کو پاکستان کے جدید، فعال اور ٹیکنالوجی پر مبنی ڈیزاسٹر مینجمنٹ نظام اور ارلی وارننگ میکانزم پر تفصیلی بریفنگ دی۔دورے میں تاجکستان، میانمار، سری لنکا، عمان، اسپین، جاپان، بنگلہ دیش، جرمنی اور کینیڈا سمیت متعدد ممالک کے سفارتکاروں نے بالمشافہ شرکت کی، جبکہ دنیا بھر میں تعینات پاکستان کے 34 سے زائد سفیروں اور ہیڈز آف مشنز نے ویڈیو لنک کے ذریعے اجلاس میں شمولیت اختیار کی۔ اجلاس کے دوران بالخصوص سال 2026 کے دوران پاکستان سمیت عالمی سطح پر درپیش قدرتی آفات اور موسمیاتی خطرات کا احاطہ کیا گیا۔ سفارتی وفد نے این ڈی ایم اے کے عالمی معیار کے ایمرجنسی رسپانس نظام کو سراہا اور موسمیاتی تبدیلی سے نمٹنے کے لیے ادارہ جاتی تعاون بڑھانے کے عزم کا اظہار کیا۔