فیک نیوز کی روک تھام ناگزیر، صحافت ذمہ دارانہ پیشہ ہے: عظمیٰ بخاری

وزیر اطلاعات پنجاب عظمیٰ بخاری نے کونسل آف پاکستان نیوز پیپرز ایڈیٹرز (CPNE) کے عہدیداروں سے گفتگو کرتے ہوئے کہا ہے کہ سوشل میڈیا پر فیک نیوز، گالم گلوچ اور بے بنیاد الزامات کی روک تھام ناگزیر ہو چکی ہے اور کسی کی عزت اچھالنا صحافت کے زمرے میں نہیں آتا۔

صوبائی وزیر نے زور دیا کہ الزام تراشی کرنے والوں کو ثبوت پیش کرنا ہوں گے اور کسی بھی خبر کو شائع یا نشر کرنے سے قبل متعلقہ فریق کا مؤقف لینا صحافتی اخلاقیات کا بنیادی حصہ ہے۔ انہوں نے مزید کہا کہ بیرونِ ملک بیٹھے یوٹیوبرز کے ملک دشمن پروپیگنڈے کی اجازت نہیں دی جا سکتی۔ اس موقع پر سی پی این ای کے صدر کاظم خان نے کہا کہ ان کی تنظیم نے فیک نیوز کے خلاف باقاعدہ پالیسی مرتب کی ہے اور پریس فریڈم کمیٹی کے قائم ہونے کے بعد بغیر شواہد کے مس انفارمیشن پھیلانے کی کسی کو اجازت نہیں۔