شمالی کوریا کا ایک اور بیلسٹک میزائل تجربہ ، جنوبی کوریا نے دفاعی تیاری بڑھا دی

شمالی کوریا نے ایک بار پھر جزیرہ نما کوریا کے مشرقی سمندر (بحرِ جاپان) کی جانب مختصر فاصلے تک مار کرنے والے بیلسٹک میزائل کا کامیاب تجربہ کیا ہے۔ جنوبی کوریا اور جاپانی حکام کی جانب سے اس لانچ کی تصدیق کے بعد خطے میں کشیدگی بڑھ گئی ہے، جس کے پیشِ نظر جنوبی کوریا کی فوج نے اپنی نگرانی اور دفاعی تیاریوں میں نمایاں اضافہ کر دیا ہے۔

برطانوی خبر رساں ادارے کے مطابق یہ تجربہ پیانگ یانگ کی جانب سے رواں سال کیے گئے مختلف ہتھیاروں اور راکٹ سسٹمز کی سیریز کا تسلسل ہے۔ اس سے قبل جون کے آخر میں شمالی کوریا نے ملٹی پل لانچ راکٹ سسٹم اور ٹیکٹیکل بیلسٹک میزائلوں کا تجربہ کیا تھا۔ ماہرین کا کہنا ہے کہ یہ تازہ ترین عسکری اقدام جنوبی کوریا اور امریکہ کی متوقع مشترکہ فوجی مشقوں کے جواب اور جاپان کی بڑھتی ہوئی دفاعی سرگرمیوں پر پیانگ یانگ کے ردِعمل کا حصہ ہو سکتا ہے۔