نئی آٹو پالیسی، ہائبرڈ گاڑیوں کی پیداوار بند ہونے کا انکشاف

سینیٹ کی قائمہ کمیٹی برائے صنعت و پیداوار کے اجلاس میں انکشاف ہوا ہے کہ نئی آٹو پالیسی اور ٹیرف کا تعین نہ ہونے کے باعث گزشتہ 22 روز سے ملک بھر میں ہائبرڈ (Hybrid) اور پلگ اِن ہائبرڈ (Plug-in Hybrid) گاڑیوں کی پیداوار مکمل طور پر ٹھپ ہے۔ سلیم مانڈوی والا کی زیر صدارت منعقدہ اجلاس میں آٹو انڈسٹری کے نمائندے نے خبردار کیا کہ اگر یہ صورتحال مزید 7 دن جاری رہی تو کمپنیوں کے لیے ملازمین کو تنخواہیں دینا ناگزیر حد تک مشکل ہو جائے گا۔ اس مسئلے پر وزیراعظم کے معاون خصوصی ہارون اختر خان نے یقین دہانی کرائی کہ ٹیرف پالیسی بورڈ کا ہنگامی اجلاس بلا کر نئی پالیسی فائنل ہوتے ہی یہ معاملہ حل کر لیا جائے گا۔

اجلاس کے دوران نئے ایکسپورٹ پروسیسنگ زونز (EPZs) کے قیام اور برآمدی کوٹہ سے متعلق بھی اہم بریفنگ دی گئی۔ وزارتِ صنعت و پیداوار کے حکام نے بتایا کہ نئے ای پی زیڈز کے قیام پر پابندی کا فیصلہ برقرار رکھا گیا ہے اور ٹیرف ایریا کو دیا جانے والا برآمدی کوٹہ ختم کرنے کی تجویز ایف بی آر کو بھیج دی گئی ہے، جس پر ستمبر 2026 تک عملدرآمد کی سفارش کی گئی ہے۔ حکام نے انکشاف کیا کہ یہ اقدامات وزارتِ صنعت کے نہیں بلکہ عالمی مالیاتی فنڈ (IMF) کے ساتھ ہونے والے مذاکرات کا نتیجہ ہیں، کیونکہ آئی ایم ایف کو تحفظات تھے کہ ان زونز کی کمپنیاں ٹیکسز ادا نہیں کرتیں۔

اجلاس میں موجود صنعتکاروں نے آئی ایم ایف کے حوالے سے حکام کے موقف کو رد کرتے ہوئے کہا کہ ان کے پاس تحریری ثبوت موجود ہیں کہ ای پی زیڈز پر پابندی آئی ایم ایف کا مطالبات میں شامل نہیں ہے۔ صنعتکاروں نے برآمد کنندگان کی سہولت کے لیے ای پی زیڈ مراعات کی فوری بحالی کا مطالبہ کیا۔ اس پر چیئرمین کمیٹی سلیم مانڈوی والا نے ہدایت کی کہ وزارت صنعت اور آئی ایم ایف کے ساتھ مل بیٹھ کر معاملات طے کیے جائیں اور انڈسٹری کے مسائل کا فوری اور پائیدار حل نکالا جائے۔