آزاد کشمیر اسمبلی کی مخصوص نشستوں پر امیدواروں کی دستبرداری مکمل، کل پولنگ ہوگی

آزاد کشمیر اسمبلی کی مخصوص نشستوں کے لیے امیدواروں کی دستبرداری کا مرحلہ مکمل ہو گیا ہے، جس کے بعد خواتین کی 5 مخصوص نشستوں پر 6 امیدواروں کے درمیان مقابلہ ہوگا۔ شاہین کوثر ڈار کی جانب سے کاغذات واپس لیے جانے کے بعد رفعت عابد، زوبیہ خورشید، سحرش قمر، فرزانہ یعقوب، مریم ادریس اور مریم زمان میدان میں رہ گئی ہیں۔ اسی طرح علما و مشائخ کی ایک نشست پر حافظ طارق محمود اور محمد مظہر سعید، جبکہ ٹیکنوکریٹس کی نشست پر سید افتخار گیلانی اور صاحبزادہ ذوالفقار علی مدمقابل ہوں گے۔ بیرونِ ملک مقیم باشندوں کی نشست پر بلامقابلہ انتخاب پہلے ہی مکمل ہو چکا ہے۔ ان تمام نشستوں کے لیے پولنگ کل مظفرآباد اسمبلی ہال میں صبح 10 سے دوپہر 1 بجے تک جاری رہے گی۔