ایرانی کرنسی نئی امریکی پابندیوں کے باعث تاریخ کی کم ترین سطح پر پہنچ گئی

امریکا کی جانب سے عائد کردہ نئی معاشی پابندیوں کے اعلان کے بعد ایرانی اوپن مارکیٹ میں ڈالر کے مقابلے میں تومان کی قدر تاریخ کی کم ترین سطح پر پہنچ گئی ہے، جہاں ایک امریکی ڈالر 2 لاکھ تومان سے بھی تجاوز کر گیا ہے۔ غیر ملکی میڈیا رپورٹس کے مطابق اس شدید معاشی دباؤ کے باعث ایران میں سالانہ مہنگائی کی شرح بڑھ کر 61.4 فیصد ہو گئی ہے جبکہ اشیائے خورونوش کی قیمتوں میں گزشتہ سال کی نسبت 128.1 فیصد کا خطیر اضافہ ریکارڈ کیا گیا ہے۔ ایرانی صدر مسعود پزشکیان نے عوام کو درپیش معاشی مشکلات اور مہنگائی کے چیلنجز کو تسلیم کرتے ہوئے کہا ہے کہ حکومت شہریوں کے مستقبل کو محفوظ بنانے، روزگار کے مواقع پیدا کرنے اور مہنگائی پر قابو پانے کے لیے تمام تر صلاحیتیں کارآمد بنا رہی ہے۔